奶奶:跟傳統坐月唔可以同枱食飯 日日買叉燒飯打發新抱

女人語
Posted on September 3, 2018 By       8,096

有網民喺forum講話本身打算請陪月,但姑奶同奶奶極力反對。卒之就奶奶過嚟幫佢坐月啦,點知第一日就話跟「傳統」唔可以同枱食飯,無論嗰日好唔好餸,新抱都係食叉燒飯或者罐頭食物,仲要係喺房坐櫈仔食。嘩!而家咩年代呀,妹仔咁嘅待遇嚟架喎!

最大鑊係個老公仲反問返樓主,唔通你想大魚大肉呀?呢啲老公真係冇用,自己老婆都唔識好好照顧,要佢何用?大佬呀,女人喺鬼門關行咗一轉先生到個bb出嚟架,點都唔會淪落到要食叉燒飯掛?普遍人都唔會食得咁求其啦,更何況係坐緊月要補身子時。其實蒸下肉餅,炒碟菜都夠做喇,有冇咁難呀。

呀奶奶作為過來人,又黑心咗啲。自己都生過仔冇理由唔明坐月係咩心情。有網民話奶奶咁樣等於下馬威,等新抱知道邊個先係女主人,唔好以為生咗小朋友就巴巴閉,真係多得呢啲個仔都做人老豆仲要多多事幹嘅奶奶唔少。個姑奶跳出嚟阻止請陪月就更加九唔搭八,計Juicy媽我話,身體係自己嘅,要點坐月根本唔輪到其他人多多聲氣。

好多網民都話其實樓主唔使咁聽話,人哋畀乜就食乜架嘛。睇見叉燒飯就好放埋一邊,自己打電話叫外賣喇。有時女人就係要為自己打算多啲,人哋唔錫自己,咪自己爭取。好多婆媳糾紛都係奶奶見新抱太善良,老公又唔撐,咪恰得就恰囉。其他事可能忍得,但坐月呢啲嘢,都係自己安排好。

其實而家都二十世紀,唔係夫家唔畀飽飯食就餓死架嘛。女人有時就係要惡啲硬淨啲先得!

入嚟討論區一齊傾

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
© Baby-Kingdom.com Limited. All rights reserved.