產房傳聞:排胎盤痛過順產 惡奶奶唔畀新抱開刀

女人語
Posted on September 5, 2018 By       11,437

生仔之痛,相信都唔使多講。但原來產房裡面有個都市傳說:排胎盤比順產恐怖。唔知咁多位媽媽有冇試過!我自己就冇經歷過,但聽過唔少朋友講嘅經歷,真係幾驚架!有媽媽試過畀醫生徒手入去摷返個胎盤出嚟,係徒手!老公係一邊睇住,都頂唔順‥‥‥暈埋!(咁又係,見到自己老婆血流成河,心血少啲都頂唔順。)可見當時嘅慘烈程度。

曾畀醫生用手「搞掂」排胎盤嘅網民,直言痛苦到癲咗!胎盤出到嚟仲要散晒砌唔返,醫生仲話「唔使砌,應該冇問題」。嘩,聽落好牙煙喎,好彩真係冇殘留咋,唔係都唔知點算。

因為聽講排胎盤痛過順產,有媽媽就堅拒呢件事發生。當時助產士推肚胎盤都唔出,見醫生想伸手入去,嚇到個心離一離!當時助產士已經準備推佢上手術室,差少少就要經歷呢個地獄!呢位媽媽過後造成好大陰影,生第二同第三個時要老公同助產士發誓,有事要即刻上手術室,唔準醫生靠近!

其實生仔嗰時好似將條命交出嚟咁。好多時痛到神智不清,變得好被動,要靠身邊人做決定。有網民見過有產婦痛到死死下,醫護人員問家屬要唔要開刀,奶奶話:「唔需要!生仔係咁痛架啦!」而家係有特殊情況嘛大嬸,一陣出人命你負責得起?最得人驚係個老公聲都唔聲,由得個奶奶發癲。

咁我相信咁嘅惡奶奶唔多嘅,不過各位準媽媽入產房前不妨同老公協商吓,唔好到時醫生問「開唔開刀?」之類嘅問題時傻傻吓唔識答。隊友可靠,產婦先可以無後顧之憂地「必」隻B 出嚟架嘛!

不過幾辛苦都好,見到小朋友順利出世就咩都抵返晒。其實講起生仔有幾痛,唔係女人要搶光環,人生咁難忘嘅經歷唔係講吓都唔得呀?!

即刻入討論區一齊傾

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
© Baby-Kingdom.com Limited. All rights reserved.