《延禧攻略》眾妃6個老婆特質!富察皇后以老公為先,你係邊個?

女人語
Posted on September 4, 2018 By       6,022

《延禧攻略》大結局咗冇耐,劇內角色仲喺腦裡面揮之不去~既然係咁,就等我哋嚟盤點6個妃嬪身上見到嘅老婆特質!快啲睇吓自己屬於邊一個~

富察皇后:溫柔婉約,有正義感


皇后作為六宮之首,母儀天下。凡事以老公為先,會為老公協調一切。雖然正經咗少少、認真咗少少,但偶爾跳一隻「洛神舞」就令人眼前一亮架!

高貴妃:刁蠻任性,想被重視


高貴妃係好奸仲成日眼超超,但對住皇上好嗲架!見到皇上唔理佢就會深深不忿,平時又會表演唱戲。雖然大癲大肺,但為咗老公視線離唔開自己,成日會製造新鮮感氹老公!

純妃:外冷內熱,敢愛敢恨

純紀先前故意避寵,搞到皇上都摸不著頭腦,但就更加好奇佢點諗。呢類老婆一般都才華洋溢令老公欣賞架!不過心思收得咁埋,有時真係唔知佢諗緊咩~

愉妃:與世無爭,默默付出


愉妃只想守住五阿哥好好過日子,老公有冇去滾根本唔想理。唔會在意自己喺老公心裡面咩地位,全心全意貼心顧家好老婆嘅角色。

嫻妃:不喜爭鬥,變攻心計


余施曼,唔好意思,係嫻妃先啱。佢生性恬淡,唔打算爭寵或者害人,但後來就變身喇!就好似被老公踩到底線就會變臉嘅老婆,老公就要小心啲喇!

魏瓔珞:愛恨分明,赤子之心


瓔珞敢愛敢恨,愛就愛到盡~寧願大雪中叩頭都唔肯否認自己對傅恆嘅心意,但叩完就真正放低。兩個字:瀟灑!不過嫁一個老公就認定係佢,會用一世時間去證明。

不過不變嘅係,無論係邊類老婆,都唔會容許老公有其他后宮佳麗!發吓夢好喇哈哈~~

(圖片來自《延禧攻略》電影劇宣傳照)

金秀妍
作為童心未泯小編,希望發掘更多小確幸、大美好。
 
© Baby-Kingdom.com Limited. All rights reserved.