《老公使錢冇概念合集》&應對方法 老婆:真係講十次都嬲!

夫妻關係
Posted on September 14, 2018 By       3,963

人人都話「女人錢好易賺」,但其實男人錢又何嘗唔係呢!唔少人妻喺Forum留言呻自己老公使錢冇槪念,超Budget嘅手法層出不窮,激到老婆紮紮跳,一齊嚟睇吓大家嘅經歷,話唔定你都遇過!

 

Level.1 做一次運動就買貴價球拍

有網友話老公應朋友邀請去打乒乓球,諗住「老公唔係打開,又冇打算經常打,咪買塊平至中價囉」,點知老公係都要買塊貴嘅;另一位網友嘅老公又係跟朋友去打高爾夫球,但「買咗兩枝貴價Golf 球棍,打咗一次!」um……可能……啲老公諗住貴價球拍喺朋友面前可以威啲?

 

Level.2 買畀仔女嘅嘢唔睇舒適襟用度,最緊要靚、新!

唔少媽媽買衣物畀小朋友都會買太貴,甚至唔介意着親友嘅二手衫,皆因小朋友大得好快,啲衫褲鞋襪分分鐘着半年已經唔啱着!
但有位網友嘅老公似乎唔明白呢個道理:「阿仔讀K1時老公話要買Nike波鞋畀佢,雖然唔係好貴,但我問佢點解,佢嘅原因係靚啲、型啲!但K1着鞋最緊要係夠輕、舒服同埋護足!」
仲有個網友就話佢囡囡讀初中時,老公話要買最新嗰款iPhone,但網友D話:「我哋又唔係經濟富貴,個個月掹掹緊咋!」同埋買平價舊款機,冇咁易畀人偷吖嘛!

 

Level.3 買墨變買Printer

有網友留言:「上次話Printer冇墨佢落街買墨,佢買咗墨同另一部印相嘅printer!盛惠2000!」雖然作為老婆,一定會畀呢位老公激死,但作為旁觀者見到呢個例子,真係忍唔住笑咗出嚟!
仲有另一位網友嘅老公都係同出一轍,去攞改好嘅西裝,點知畀人Sell到買多咗套新款嘅貴價西裝!

 

Level.4 買最新款電話畀工人

有位網友話朝早臨返工嗰陣,得知工人部Smart Phone壞咗,佢同老公講話買過部最平而又用到Whatsapp嘅算啦,點知放工返嚟,發現老公買咗部2000蚊嘅新款華為,「我問佢見到最平Smart Phone係幾錢,佢話1300蚊,我問佢點解唔買,佢話因為想買新Model!」呢位網友話今個月屋企家庭開支已經超標,但老公完全答唔到買新款電話嘅理由,好似完全冇諗過買呢個電話嘅用途同目的咁,「堅嬲!我講十次都係堅嬲!」

 

Level. 5 襯老婆旅行落單買車

對於上述網友講嘅例子,有一位網友表示「我已經進化到一千、幾百嗰啲費事勞氣」,因為佢老公直頭趁佢去旅行先落單!「佢今鑊玩到去買車,我哋係需要換車,但我唔需要靚車,佢喺我去旅行期間,落咗訂,車價比我Budget多咗一倍!」

 

男人購物思維:新款、有型

睇返多位網友嘅經歷,男人同女人買嘢嘅思維模式真係好唔同,啲老公買嘢似乎鍾意新款同有型,多過睇家庭Budget,特別當牽涉到啲電子產品、手錶呀、車呀等等,佢哋一見到新款型號就好難忍手,所以買嘢經常超出老婆心目中嘅預算!

 

所以,各位老婆叫老公買嘢嘅時候,應該……
1. 明碼實價講明Budget幾多
2. 叫老公做決定前問一問老婆先
3. 如果真係買咗啲唔啱心水嘅嘢,堅持退貨
4. 老婆直接自己買!

 

Click入去一齊傾

BK Milk
《親子王國》為爸爸媽媽提供的優質營養食糧。
 
© Baby-Kingdom.com Limited. All rights reserved.