食飯撞到朋友,行開傾兩句,點知畀老公鬧唔尊重……

夫妻關係
Posted on September 24, 2018 By       5,637

有緣千里能相會,難得喺街撞到朋友,唔係唔傾兩句呀嘛!但有位網友話嗰日佢同老公、兩個仔出街食飯嘅時候,隔兩張枱遇到三個朋友,咁佢落完單等上菜嘅時候就去朋友枱吹水啦,點知吹完水返埋位食嘢,老公開始黑面,講每句嘢都有骨,結果返屋企仲嘈起上嚟添!

唔講真係以為樓主吹咗半個鐘水,吹到啲嘢食凍晒先返埋位,但原來佢只係吹咗水大約5至8分鐘……結果就畀老公話唔尊重佢!

有部分網友覺得只係「好小事啫」,認為係個老公「小器」、「小題大作」。其中仲啲網友話自己屋企件老公都係咁,每逢老婆出街都黑面,又唔鍾意老婆掛住同其他人傾偈好似忽略咗佢咁。

亦有部分網友認為清官難審家庭事,係大家嘅觀點唔同,有人話如果換轉佢係樓主,「見到朋友都未必會行咗去」,因為「Family day嘛,Family行先囉。」

Juicy媽就覺得,如果啲老公真係單純只為一件個別嘅「過隔離枱吹水」事件而嬲,咁梗係小器啦!但會唔會係啲老公一早有其他事唔開心但又冇出聲,結果積埋積埋一次過爆出嚟?你知啦,啲男人十個有十一個都鍾意收收埋埋死都唔肯講心事出嚟架嘛!

男人呢種生物相當要面子,只要稍微覺得畀人忽略咗,就會唔開心、覺得自己不受重視,有網友都嘗試幫樓主搵出問題癥結,「會唔會係因為你冇喺朋友面前介紹你老公?有啲男人覺得人哋唔同佢打招呼就係冇禮貌。」有人提議樓主下次「入紙申請」,問聲老公「好唔好」,等佢覺得受尊重。

嗱,樓主個老公究心底裏係為咩事唔開心,就真係樓主先知,但如果兩公婆一日唔傾掂佢,夫妻嘅芥蒂就只會愈嚟愈深,為咗自己同兩個仔嘅將來,真係建議樓主搵日下咗啖氣之後,同老公傾吓心事喔!

Click入嚟一齊評吓理

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
© Baby-Kingdom.com Limited. All rights reserved.