小朋友飯局機不離手惹不滿,家長可點教?

父母教室
Posted on September 26, 2018 By       4,125

而家啲小學生已經人人一部手機,唔係打機就玩Snapchat、Instagram同啲朋友密密斟,可能同班「朋友」仲交流多過屋企人。我覺得呢個風氣都幾病態,對住部手機日傾夜傾,面對面又好似唔識講嘢咁。有網民喺forum度講中秋做節嗰時,小朋友基本上機不離手,搞到其他親戚都有啲微言。其實做父母嘅,對呢個情況係咪要負上責任?

其實呢啲時候父母愈干涉,小朋友就愈反感,特別係小朋友升中之後。佢哋漸漸長大,需要自己空間。雖說青春期係難搞,有人就話親子關係嘅建立唔係一朝一夕。以往感情深厚的話,唔會一刀切打機就完全唔理父母嘅,應該會有彼此協商嘅空間。家長只好嘗試同子女溝通,以免佢哋不能自拔。不過有幾多個小朋友會乖乖聽話吖!

有時旁人只道小朋友咁係因為父母唔教,或者教得唔好。但其實好多時唔係冇心教,只係用盡方法都解決唔到。綜合網民意見,家中有「機迷」嘅家長可以試吓咁做:

1. 阻止過於沉迷手機,尤其是喺長輩在座嘅飯局,要講明唔可以冇禮貌,一手筷子一手撳機;
2. 強硬制止佢哋打機同用社交媒體只會適得其反,明白佢哋的確需要呢啲渠道去同同學仔交流,係呢個年代嘅正常社交;
3. 理解小朋友踏入青春期,受荷爾蒙影響較容易同父母有衝突。日常生活唔好太多管束,避免令彼此嘅關係受損。

即上討論區一齊傾

他條媽媽
佛系育兒~堅信媽媽開心小朋友先會開心!
 
© Baby-Kingdom.com Limited. All rights reserved.