叫咩食都唔啱!點名食嘢!同長老食飯真係好煩

女人語
Posted on October 11, 2018 By       1,297

同長輩食飯真係好多令人啼笑皆非嘅事發生!有網民就喺forum講述自己同「皇太后」(係邊個就大家心照啦)飲茶嘅經歷,人哋嗌嘢食就話人唔預佢嗰份,自己嗌就數人頭個個有份,唔使問吓人哋食唔食架喎。飲茶飲到咁,都好冇癮啦。個個點名報到咁食蝦餃燒賣奶黃包咁,有意思咩?

仲有問責制,食唔晒時就問碟嘢邊個叫,叫嗰個就要負責清晒佢,咁搞法都幾大壓力。真係食唔落有咩解決方法?一係堅決唔食,一係就夾到埋嚟放到完場都唔好食。就好似有網民咁講,老公唔食叫食,佢就叫佢兩歲囡囡食啦,囡囡都識答:唔食!飽飽!

有趣緻嘅皇太后就會檢閱點心紙,逐樣問「邊個叫架」、「做咩叫呢樣,你想食呀?」、「叫燒賣?好多肥豬肉喎?」、「叫菜?平時冇菜食咩?」、「叫油雞?唔係新鮮雞有咩好食?」問完仲唔滿意,彷彿大家叫啲咩垃圾咁,不情不願咁遞點心紙出去。最大鑊係如果皇太后發板只會叫包食,六個大人叫三籠叉燒包!

好啦,咁唔飲茶總得啦掛。原來唔係,自助餐都係出事!每一round都會關心你拎咗咩返嚟:「你食菜呀?食魚呀?食肉呀?食壽司呀?做咩咁快開始食甜品呀?」畀著我真係會有衝動講句:「不如我哋專心食嘢啦好嘛……」

其實寫咁大篇嘢嚟講,都係想大家笑吓啫。講真見到長老嘅時間唔算多,有咩古怪事發生笑吓咪算囉,不過偶爾呻下都要嘅~

即刻上討論區一齊傾

他條媽媽
佛系育兒~堅信媽媽開心小朋友先會開心!
 
© Baby-Kingdom.com Limited. All rights reserved.