2018-11-08

1.7K

小JM料理台。自家製。簡易無蛋。流心芝士酥皮撻(2y+)

媽媽嘅氣管敏感問題足足持續咗幾星期,最近就連小JM都突然 #高燒 病咗,還好食藥休息後終於無晒事。

見小JM精神唔錯,就帶小JM去食好西兼行街買衫扮靚。今日嘅小JM 好窩心, 講咗好多令人心甜嘅說話,請容我放閃一下?

小JM冧人語錄:
媽咪,你小心行(路),會跣架,拖住(我)啦!
媽咪,熱喎,你呼呼先食啦!
媽咪,你病要藥藥喎!乖會快啲好(返)!
媽咪,我好掛你/鍾意你呀!
媽咪,你唔(駛)驚,有我係度嘛!

全日被嗲精嗲到暈,其實媽媽都好心甜。問小JM今晚想食咩,佢竟然想食芝士撻, 咁為娘嘅又點捨得唔整呢?一於整個 特濃流心芝士撻 過你同爸爸嘆!

雖然話媽媽整, 但小JM都有乖乖幫手Cut酥皮架!一齊整嘢食又真係幾開心嘅事!

材料:

酥皮   一張
牛奶   40ml
片裝芝士 2~3片
糖     10ml
*可按需要將片裝芝士轉成BB芝士喔!*

做法:

1.) 先將酥皮取出,並以刀模切出形狀,備用

2.) 將酥皮放入撻模,並以手指輕按以令酥皮貼服於撻模上,用小叉係酥皮上戳出小孔透氣,再放入冰箱冷藏30分鐘。

小提示:
戳小孔透氣係為咗預防酥皮脹起,但要小心唔好戳穿個皮喔!唔係就會穿,流晒啲餡出來架啦!

3.) 將牛奶倒入小鍋中慢煮,加入少許糖再加以攪伴。

4.) 將片裝芝士加入已煮開嘅牛奶中,慢慢攪拌至溶化。

5.) 取出酥皮撻模,並用匙羹將芝士餡料平均倒入酥皮撻模中。

6.) 預熱氣炸鍋後,將芝士酥皮撻放入以180度烤焗約 8至 10分鐘,即成

如果想容易啲甩撻模就要靜待數分鐘,等個撻模冷卻,咁就會易啲甩同靚啲架啦!

【編按:以上內容為作者之個人意見及立場】

相關文章

【營養師話你知】鈣質與維他命D對小朋友的重要性!

【兒童健康】零食越禁越愛?營養師教3大準則吃得健康又開心

小朋友情緒易不穩或因大腦機制影響!營養師:4個因素影響大腦健康

【糖果陷阱】兒童節小朋友狂食糖?5大健康危機!

緊貼新冠肺炎最新相關資訊