2018-11-01

15.5K

【媽媽的進化史】一胎用書養,二胎當豬養!二寶家庭的4個特點

生兩個小朋友嘅媽媽都有個共同嘅小秘密,就係唔小心將第二胎當咗豬養。

第一胎睇好多書,第二胎當係隻豬 

大寶出世時,作為新手爸媽嘅我哋手忙腳亂,又容易太緊張。不停上網睇資料、買書睇同問人意見。第二胎就放鬆好多,豬有咩特點?咪就係食得瞓得囉,呢兩樣嘢冇問題就應該冇大問題嘅。唔再事事都要跟書上面講或者有專家支持嘅方法去做,反而識得觀察自己小朋友,用適合佢嘅方式湊佢(自以為育兒專家巴閉啦)。

第一胎緊張大師,第二胎佛系湊B 

大寶飲奶飲唔夠,瞓得唔夠耐,生長線落後都會好擔心。心諗死啦,我個B而家已經進度落後,以後特別細粒、身體唔好、學業追唔上點算?到二寶出世就好明白,所謂指標都係「僅供參考」嘅啫~小朋友個個唔同,發展步伐就梗係唔會倒模一樣啦。太執著少少差距只會搞到自己唔開心~

第一胎如珠如寶,第二胎點就點好

好記得大寶初初識爬識走,全家好似如臨大敵咁。怕地下唔乾淨沾染咩毒返嚟,又怕佢撞到檯角乜乜乜。如果撞到少少呀,個心真係痛到眼淚都流出嚟呀。二寶開始爬嚟爬去時就睇化咗啦,細蚊仔唔跌點會大呀哈哈!不過講係咁講,屋企都會做足防撞措施,出街都會睇實嘅。

第一胎父母教導,第二胎兄姊教路

大寶喺BB時整個世界都係得爸爸媽媽或者其他照顧者,而二寶就有大寶陪啦~衣食住行都有個「樣板」睇住,雖然(喺媽咪眼中)大家都係BB ,其實大寶可以教到二寶唔少嘢架,食嘢講嘢都會學得快啲。一定快過得大人教囉~不過相對地大寶都會學識照顧人,唔係得細佬妹有得益嘅!

【編按:以上內容為作者之個人意見及立場】

相關文章

【港識教養】共創共享家的幸福

小產後不斷被長輩催生仔 港女感激好老公出言維護

催生10小時誕兒子家人卻只關心寶寶 爸爸留下安慰愛女惹淚崩

【婆媳關係】婆媳之間多爭執?專家:婆媳關係緊張全因3大心理矛盾!

緊貼新冠肺炎最新相關資訊