陀B女被問「會唔會驗錯」新抱:生仔生女唔到你話事

女人語
Posted on November 7, 2018 By       6,813

我有朋友驗到陀嘅係囡囡,佢奶奶劈頭就問咗句:「女嚟架?會唔會有機會驗錯?」呀奶奶,其實nifty 99.9%準架喎,你咁問係咪搞事先。咁當然就搞到我朋友心情勁差,覺得男家一定唔會真心錫囡囡,如果第日生咗囝囝肯定會偏心咁啦。

講開又講,原來唔少媽媽有咁嘅經歷!有啲奶奶算係比較婉轉,聽到係女之後沉默咗一陣,講話:「女都好,家姐可以照顧細佬」。咩叫「都好」?家姐存在價值只得照顧細佬?冇嘢呀!同埋咁嘅講法真係一廂情願,莫講話新抱唔一定會再生,再生包生仔嘅咩?

又有奶奶問過「會唔會驗錯」呢個問題之後,新抱嬲嬲豬,再有BB時同佢講自己陀緊孖女添呀!其實我都唔明,有咗係開心事,點解因為係女就搞到件事唔啱咁。孖女對媽媽嚟講係雙倍幸福,對重男輕女嘅人就係雙倍激心啦。你話係咪自己攞嚟煩!

好心啦,生女仔有幾失禮呀。冇女人就冇人生仔啦,仲有奶奶自己都係女人嚟,點會一齊重男輕女架。有媽媽就話就算男家幾恨仔,孫女出世就唔同講法。講真BB女咁得意,邊有人唔鐘意先得架!到時識行識走唔好爭住抱添呀~

其實而家咩年代先得架,又唔係男人先落得田分到地,女就一定外嫁。好心就唔好咁老土啦,對生仔有情意結唔係問題,個人意願嚟,問題係干涉太多嘛!生唔生輪唔到其他人指指點點,無端端惹人唔開心好無謂囉。

入嚟討論區一齊傾

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
© Baby-Kingdom.com Limited. All rights reserved.