「幼稚園放榜焦慮症候群」心情如坐過山車 即時測試你焦慮程度

學習教育
Posted on November 25, 2018 By       3,555

坐立不安、胃痛、頭痛、緊張失眠……你係咪都同我一樣懷住呢份心情等緊幼稚園面試嘅放榜結果呢?如果無,我真係恭喜你啦!同埋可唔可以留言傳授我放鬆秘笈?因為我真係好!緊!張!其實總括而言,我覺得若果你都擁有以下症狀,或者已經係患上咗一種病,而我將佢稱之為「放榜焦慮症候群」幼稚園mode。

想知自己係咪患者?不如一齊做個小測驗:

沒有 +0分 間中 +1分 經常 +3分

1/ 有緊張到想喊嘅感覺?
2/ 內心反覆重播小朋友面試情況?
3/ 無論見到咩人都想同佢分享自己小朋友面試情況?
4/ 考前考後都會網上搜尋有關面試貼士,睇下小朋友做到幾多?
5/ 全職家長日睇信封無數次?
在職家長不斷F5討論區睇有無人收到放榜信?
6/ 自我擬定學校收生準則?(例如:早報名有著數。)
7/ 將放榜日期張貼於屋企/辦公室大小角落,或轉傳到不同通訊群組?
8/ 詢問身邊老師朋友或朋友嘅老師朋友意見?
9/ 假設收到唔同學校正取/備取生之後,如何安排?

0-5分 佛系家長
能夠擁有呢份心情真係令人羨慕,相信世間嘅煩擾都應該唔關你事。

6-15分 船到橋頭自然直家長
緊張子女入唔入到心儀學校,作為家長確係好難話唔擔心就唔擔心,但若果諗諗下都能夠覺得「船到橋頭自然直」,唔會無書讀嘅,咁焦慮同你都仲係有啲距離。

16-25分 緊張到變形家長
你要記住「You are not alone!」,焦慮並唔係問題,搵地方個地方好好紓發啦,大家都一樣緊張到爆炸,不妨喺討論區搵朋友傾下講下,時間好快過,吸引力法則,諗好嘢嚟好嘢,比啲信心!一定得!

26+分 極級焦慮症候群家長
Stop!停一停,吸啖氣,無事嘅!既然試都考咗,再諗都改變唔到結果,依家先係小朋友學習嘅開始,如果結果真係唔理想,下年都仲可以考插班嘛!正所謂考學校睇緣份,無最好嘅學校,只有最適合,最重要都係小朋友讀得開心嘛!

以上測試純粹係我個人臨床心理實驗,其實都係希望大家可以放空幾秒輕鬆下啦,祝大家好運!(無咩事我出返去撳F5。)

艾安素記事本
定咩的媽是陳寶, 讓愛包圍我們的小安素。
 
© Baby-Kingdom.com Limited. All rights reserved.