【超細B面試記】滑鐵盧是命中注定?小朋友感受最重要

學習教育
Posted on November 29, 2018 By       2,496

幼稚園面試開始放榜,已經食咗幾封Waiting信嘅鯊魚太心情真係好低落。反反覆覆咁喺度諗係咪自己功課做得唔夠,係咪當中安排唔夠周詳,愈諗就諗down。其實只得23個月嘅鯊寶面試表現已經好好,絕對係做足佢嘅120分,但無奈超細B能力確實係有差異。再講學前人話齋,即使考得再好,天外有天,人外有人,考幼稚園都係緣份也。

道理係知,道理係明,但道理諗得再通,都實在係會唔開心,12月超細B想讀神幼、名校?家長心臟一定要夠強,面對一封又一封嘅Waiting信,彷彿呢場滑鐵盧係必然要遇上,從中學習調節挫敗感,同時認清方向,真係作為家長一堂好深刻嘅課堂。

然而鯊魚太覺得即使再唔開心都好,都應該時刻提醒自己,鯊寶嘅心情先係最重要。千祈唔好因為小朋友面試表現唔好,又或者結果唔理想,就覺得世界末日咁!小朋友得嗰幾歲人仔,唔識分咩係神幼、名校,但都一定知道自己父母唔開心。如果單單只係因為小朋友入唔到家長自己心儀嘅學校,就搞到成家都愁雲慘霧,確係本末倒置。

講到底,做父母想幫小朋友揀間好學校,最終都係想佢好,想佢開心啫。希望各位(包括我自己)都可以提起精神!路係好漫長,但只要盡咗力,你嘅用心,佢一定會明白嘅,唔好因為一刻嘅唔如意,而白白浪費咗同寶寶相處嘅每一分、每一秒!要記住,小朋友先係最根本!

鯊魚太與寶
在職傻媽,跟你分享與鯊寶的奇幻旅程
 
© Baby-Kingdom.com Limited. All rights reserved.