經常都話有媽的孩子像個寶，對於呢句說話，喺我做咗人哋阿媽之後，可以話係「不能同意更多」，原因並唔係因為我嘅身份轉變咗，而係因為呢個契機，成為咗我同阿媽同住嘅紅線。
由細到大，我都係由外婆照顧，講到同阿媽嘅關係，其實真係有啲似兩姐妹，加上我哋兩母女性格實在太似，即使唔同住，都偶爾會出現火星撞地球嘅場面；雖係咁，但對於呢個阿媽，我依然覺得佢係可靠過任何人......
所以當我哋決定想要BB嘅時候，阿媽就成為咗湊孫嘅不二人選，真係唔得佢首肯都唔敢開工咖，而向來對子女採取放任兼縱容政策嘅我阿媽，儘管自己唔多想升格做婆婆級都好，都依然膽粗粗咁應承咗我；然後是福不是禍，是禍擋不過，喺4個月之後，佢就順利升LV.成為待任婆婆，亦開展同我嘅同居生活。
回想喺準備同居同開始同居嘅時候，真係超級無敵咁多爭拗（當然依家都偶有開拖嘅時候），差啲就要釀出血案，但好彩我哋都一一撐過咗，再望望身邊嘅朋友，無論係待產定坐月，以至湊B到照顧我哋嘅起居飲食，如果無咗呢位萬能嘅陪月媽媽，實在唔敢想像。
記得作動嗰晚，見紅之際，我同老公仍然一舊雞▴咁，如果唔係有阿媽喺身邊，相信一定非常咁慌亂...所以話定咩嘅誕生，除咗賜我一個「別人的母親」嘅身份之外，更加帶咗一份不能取代嘅禮物畀我♥
可以做住人哋個女咁做阿媽，真係全宇宙最幸福嘅事！
「媽咪，사랑합나다 ！」
▴陳寶的奇怪詞彙集：可解作一舊麥樂雞
