說好的共同進退!?九成九太太講過呢一句…

女人語
Posted on January 9, 2019 By       1,842

身為兩子之母,提到生完細仔嘅坐月日子,確係有苦自己知,由於係第二胎嘅關係,身邊嘅人,甚至連四大長老都會有種:「嗯,你都湊慣湊熟,無問題啦!」嘅諗法,相對上比起第一胎,關注度真係大大減弱,而事實上又係唔係咁呢?

先唔好講體力未回復到100%,淨係要重回4小時餵奶嘅軌道,已經夠晒刺激,仲要照顧埋大嗰個嘅起居飲食兼日常生活,真係諗起都打冷震!所以今日見到有位JM嘅分享,真係燃起咗Juicy媽嘅怒火!

雖則Juicy媽個C6都有好嘅一面,但有時真係好火滾,叫幫手湊下個仔啫,就一副「我已經做咗一日嘢,係咪抖下都唔得?」嘅嘴臉,嬲嬲地真係好想同佢講:「唔好意思!唔得囉,你可唔可以唔係佢爸爸15分鐘呀?」。事實就係面對你嘅小朋友,從來都只有佢唔So你,特別喺佢10歲之前,你都絕對無選擇!

有JM都話「畢竟男人(因人而定)沒有耐性做媽媽角色。」,其實真係明架,連自己都有耗盡耐性嘅時候,都唔好話C6對住個仔會覺得攰,但係又可以點先?點解我就要撐得住,你就頂15分鐘都同我呻先。呢份感受,相信有九成九嘅太太都曾經深深領略過,火山爆發嘅一刻,真係好想大叫一聲:「個囝你係咪冇份!」

完全投入咗呢位JM處景嘅Juicy媽就覺得,若然能力大到可以好好平衡,兼任好太太、好媽媽,甚至有時抽身做下女朋友,就梗係好啦!所以……家庭關係成與敗,真係在乎溝通與關懷,各位人夫今晚就返去畀啲愛另一半啦!

即上討論區一齊傾

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
© Baby-Kingdom.com Limited. All rights reserved.