【屋企點解變咗示範單位?】當媽以後新年最唔想面對嘅事…

女人語
Posted on February 3, 2019 By       3,553

講到以阿媽身份迎新年,其實鯊魚太都算係初哥,大吉利是,有好多難搞場面都無遇過,雖則話人生流流長,但確實唔係樣樣嘢都要試過先知衰,不過無大單嘢遇過,並唔代表新年易過,到底做咗阿媽之後,年關係如何演變成難關?

自身篇

1/ 唔想執屋:以前新年,一般都係畀阿媽夾去人哋屋企拜年,再唔係就約埋朋友去街行年宵,就算有親戚嚟屋企,其實都係探望我雙親啫,打個招呼、講句新年快樂,就可以自我隱形,最重要係咩都唔使我準備呀嘛,清潔家居、約好時間、應酬吹水,可以話通通唔關我事。

但當你做咗人阿媽,就唔知點解間屋會變身成為示範單位,個個都要嚟睇下,順便探下BB囉!無錯,係順便咖咋,因為就算你話約出去,都唔知點解對方會忽然細心,代入埋你咁濟,話上嚟方便你多啲嘛!唔好意思,其實真係唔多方便囉!有人嚟又要執整齊間屋,你話唔使啦?噤至少你都要有個位坐得舒服啩,然後仲要準備乜糕乜糕,招呼完一輪,你拍拍囉柚就走,我就仲要洗!老老實實喇,其實係方便咗邊個?

2/ 打點全家送舊迎新:原本新年買新衫係件開心事,以前仲可以趁機同老公行下街、拍下拖,但當你做咗阿媽之後,第1項因素已經消磨咗你收爐後8至9成時間,仲要為全家打點新衫、新鞋、新睡衣,有時候真係心很累……

3/ 幾時生多個:呢個問題,相信有唔少香港地嘅阿媽都唔想答,特別係有長輩壓力嗰啲;首先,其實我嘅人生並唔係只有生仔兩個字,再者,真心嘅,你係咪每月有贊助:)

外出篇
1/ 大大攤!要換片:我試過,我真係試過,大大攤、結遢遢,搵唔到換片嘅地方,排唔到設備好少少嘅育嬰室,結果兩母子一身係……唉~

2/ 唔知食咩好:其實小朋友外出用餐,有時候真係唔係樣樣都啱食,不過最可怕嘅並唔係搵唔到食肆,而係啲長輩同長長輩不停、non-stop、唔斷氣咁叫你夾啲畀阿仔食,其實可唔可以靜啲?

以上單元其實只要做人阿Q啲,又或者試下聾耳陳上身,再或者做好準備,其實都有可能避得過,但以下情況,我又應該點算好?

避無可避篇

1/ 堂哥堂妹表姐表弟教養比較:人人教育小朋友都有自己一套,平日喺屋企你有你教,我有我管,但一家人坐埋一齊食飯,就咩都擺晒上枱,例如:鯊魚太一直教導鯊寶外出用餐唔可以落地,但阿表哥就由個仔周圍跑,仲嚟邀請鯊寶一樣玩?又好似阿堂家姐由得個女不停睇住個電話兼餵埋佢食?

咁人哋點養就梗係唔關我事,但若果鯊寶再大啲,大大聲問我點解表哥可以落地、點解人哋可以可以睇住電話食飯?我真係唔知點處理…

2/ 唔好咩都比我仔食得唔得?:唔知你哋家族有無一啲新年團拜?即係成個家族訂幾團一次過見下面就算嗰啲,有時行開行埋,畀人一手抱咗個仔都唔知去咗邊度,而最怕嘅係返到你手上嘅時候,唔知佢個口食住啲乜,鯊魚太去年試過有位親戚唔知點解咁搞笑,畀咗粒M字有花生朱古力畀鯊寶食,仲話佢食得好開心……當時鯊寶只有1歲多啲,先唔好講佢適唔適合食朱古力,其實你知唔知會哽死佢?

遇到呢啲親戚,真係恭喜發財!

鯊魚太與寶
在職傻媽,跟你分享與鯊寶的奇幻旅程
 
© Baby-Kingdom.com Limited. All rights reserved.