【香港消息】多重演藝人張繼聰(Louis)首次於無線拍劇，《老表，你好野!》中飾演「有型」的宋為潮，小試牛刀即廣受好評，緊接著拍新劇《食為奴》。現實中的張繼聰一樣「有型」，訪問當天，一頭大紅大紫登場，黑色皮褸襯黑窄身褲，踏著一對半橙半藍波鞋，充滿個性亦很ＳＨＡＲＰ。張繼聰並非為型而型，「教仔」都自有一套獨到哲學，讓筆者大開眼界。工作亦不忘兒子，他透露即將推出跳舞快歌，不為其他，只為「唔想被囝囝覺得自己老土」，用行動證明自己係一個「型爸」。
栽培獨特性
型爸育有6歲兒子James，放棄傳統學校，選讀國際學校，背後原來看通透了香港傳統教育的單一化模式。「傳統學校太過單一化, 好似將每個小朋友塑造成一模一樣, 同我既教育理念有好大分別, 小朋友應當因才施教, 灌輸的人生價值觀亦應多樣化。國際學校栽培每一位小朋友獨特性, 引導多角度認識世界 , 同自己既教學理念相近。」
唔擺「老竇款」
型爸樂於與囝囝保持朋友關係，絕不擺「老豆款」。他認為父母是孩子的嚮導，以身教感化孩子比言教與體罰更有效，嚮往親子之間教學相長的樂趣。他分享自家一套「三不」育兒宗旨──不打、不鬧、不靠嚇，「相信用藤條打係最容易既方法，但小朋友根本唔明點解唔好咁做，只係怕左。大人都唔想活係一個經常用「重典」（嚴刑峻法）既社會，何況小朋友？」
認真講即聽
面對小朋友發脾氣「扭計」，型爸覺得只屬平常事，更形容為「情況同大人一樣，都會有野想要而得不到，唔開心好正常，只係表現方式唔同。」
「我一認真、嚴肅講佢（囝囝）就會聽，其實鬧得多小朋友會免疫。」型爸淡淡然說出這句充滿威力的說話。原來，他教囝主要採取寬鬆態度，用無限耐性包容，「當囝囝發脾氣，通常用兩種方法處理，一係認真地制止佢，一係用包容方法處理。」型爸多以包容態度處理，「好多時都先叫佢冷靜，再同佢慢慢討論。當然我的認真程度視乎囝囝衝動情度而定。」
不要求改變
一面教導小朋友，型爸不忘自我檢視，「是否認同所教的道理及觀念，自身又是否能做得到。例如教導孩子慷慨、互相尊重、唔好發脾氣，其實家長自己都難以做到，就不需要俾自己與子女過多壓力。」
James喜歡一些較靜態的興趣活動，如畫畫、紙黏土、砌模型等；型爸則喜歡打籃球，兩仔爺興趣南轅北轍，他笑言：「當然希望與子女有共同興趣，但愛是不需要求對方改變，我會慢慢感染佢（囝囝）。」
孩子的快樂
型爸從孩子身上獲得啟迪，學會享受生活，享受快樂。「父母比子女活得長一點，生活經驗比較豐富，可以教懂小朋友生活技能，但不一定，亦不需要比孩子聰明，其實，小朋友在本質上睇事物被成人更化，他們在任何地方都可全情玩樂，有雪玩雪，有車玩車，這便是人生本質的快樂。」
「人愈大，慾望無止境擴大，太多追求，太多比較，所以唔開心。反而，孩子活在當下，沒有甚麼執著，開心得多。」相信返璞歸真才可尋回簡單快樂。
REPORTER: K-jai
MAKE-UP: Pinky Ki
HAIR: Jobby@salonosmosis
PHOTOGRAPHER: CHOW KAR HOO @ OVERNIGHT STUDIO
VIDEO-RECORDING: 薰衣
SPECIAL THANKS: JAMIE CHENG
LOCATION: COOKOLOGY @ SHEUNG WAN
