【香港消息】劉心悠上星期前往瑪嘉烈醫院為病童打打氣, 除了送上一大樽「愛心幸運糖」, 還有教小朋友摺復活兔, 更與病童大玩各式遊戲, 現場滿載笑聲。活動透過醫院互動電視頻道「智樂遊戲台」於各個病房播放，院內所有孩子均可享受遊戲樂趣，充滿意義。接受訪問時, 心悠更大爆自己唔捨得鬧仔。
心悠希望「愛心幸運糖」可以將運氣帶給小朋友, 更希望甜味可令到他們開心, 忘記痛楚。心悠都可算細心, 驚未必每一個病童都食得, 所以交由醫院負責分派糖果。心悠當日與小孩子玩得不亦樂乎, 她分享與孩子相處心得: 「同佢地(小孩子)溝通無咁複雜, 最緊要俾耐性, 比如問左一個問題, 要等佢respond, 先至問下一個, 唔好不停追問。」
憶述孩提時代, 心悠承認自閉, 「爸爸媽媽忙住番工, 唔太識得表達自己, 大部份時間睇電視同畫畫。」不過, 她非常為下一代著想, 「經驗過一些唔好既事情, 盡量唔俾小朋友經歷。比如, 我細個比較怕醜, 第時俾小朋友多點同人接觸, 多點outdoor activity。」
心悠唔捨得「鬧仔」, 唯有交由未來老公代勞, 她笑言:「其實全世界父母都縱仔女, 係捨唔捨得鬧既問題, 當然, 我將來一定會教仔女 “ DOs AND DON’Ts ” 。不過鬧仔, 我就會將呢個『黑面』既工作交俾爸爸做, 我係一個天使。」
