呢個年代，部部手提都有影相功能，出街前幫仔女打扮得靚靚，出到街，係咁叫佢地，企定定，著得咁靚我幫你影張相先！陣間 upload 上 Facebook 比啲朋友仔睇下先！
其實我都有犯呢個錯誤，著得靚就要幫佢影相？影相比人睇真係重要嗎？但可能係影嘅過程中，佢係唔願意/唔合作！
好啦！今日媽媽帶你去觀塘一間新開 PlayHouse 玩啦！去到，喂喂喂！你企係波波池入面，拎住個波波，比我影相啦！記住唔好郁呀！
好好笑！乜唔係帶佢去玩咩？點解要企定定係波波池影相呢？要紀念丫嘛！
今日第一日返學，媽媽一早幫你著住整齊嘅校服，就早啲出門口啦！去到門口，你企定定比媽媽影返張相先！正經啲啦！影低第時比你睇返㗎！
其實影低咗，將來睇返佢會唔會仲記得係 K1 第一日返學？3年都係同一套校服，佢真係可以認得出邊一年係 K1 嗎？
今日係你生日，媽媽帶你去農莊玩好冇？好呀！今日我有幫佢影相！呢張相係朋友影低嘅！我冇帶手提入去同佢影相/自拍！因為我好想全程投入陪佢玩個夠！其實嗰日芊嶠表示好開心，好滿意！因為媽媽全日都做好一個陪玩專員嘅身分！
有時認真諗，我細嗰個陣，影相唔易！嗰啲日子，生活都唔算太好，邊仲會有時間/金錢買相機！咁個陣時係咪會因為冇相機/冇手提影相，就唔出去玩？唔係㗎喎！以前即使冇相機影低相留念，我地仍然會記得同爸爸媽媽去邊到玩過！有著回憶！嗰啲回憶係唔需要靠睇相先記得起！
而家，你成日話幫啲仔女影低相留念，5年後、10年後，你拎返啲相出嚟睇，你仔女都唔記得去過玩，做過啲咩？又或者佢會問「媽媽，點解得我一個嘅？你嗰陣係邊呀？」。個一刻你先醒覺，所謂嘅回憶原來只係淨低張相，我地同小朋友個腦海，全無回憶！所以請珍惜現在，放低電話好好陪伴小朋友去玩，因為記憶應該係腦海中，而唔係喺相中。
