【戶外歷奇+飛索】萄葡園野外歷奇農莊

小小豬成日都話自己大個仔，已經不甘於去玩PLAYHOUSE嘅波波池，為左滿足依隻貪玩豬，所以我都有周圍睇有咩好玩又刺激嘅地方帶佢去。

曾經睇網頁見到葡萄園野外農莊好似幾好玩，既可以去玩飛索又可以玩野外歷奇，都有心思思想帶小小豬去挑戰一番。但由於活動係以組團形式，一諗到依一點我又冇心情再繼續想落去(因為總係覺得要約埋一班朋友仔係有點困難)。

剛好今次就有好友已經一早BOOK好晒，我只係負責俾錢同埋如期出席，咁方便我冇理由唔帶小小豬嚟玩返轉呀~

坦白講，位於上水金錢村嘅農莊位置都有啲偏僻，就算我地渣車入去都比較難搵(仲係村內行錯路添)。基本上如果搭交通工具都要由小巴落車之後行一段小路，其實都有點唔方便。

葡萄園野外農莊就係由幾個大型貨櫃組成，加旁邊仲有一片草地，我地依兩鐘就係入面玩唔同難度嘅繩網、繩索同埋飛索啦~

一嚟到見到咁多唔同種類嘅遊戲，小小豬都已經非常心急， 不過為左安全都一定要由教練幫忙，小心佩戴好頭盔同裝備，先可以開始去玩呀~

始終玩歷奇同飛索都有一定嘅難度同危險，所以係未開始之前就一定要好留心聽教練嘅講解呀~

小朋友玩第一個活動玩節就係大家最期特嘅飛索啦~

一向小小豬都算係大膽嘅小朋友，不過要由咁過嘅樓台飛索落去，我都有一刻擔心佢唔肯玩~

但係依隻豬又真係一啲都唔驚，仲不知幾享受飛落嚟個感覺，飛完一轉又再急急腳咁走去排隊再玩過，所以佢都總共飛左三轉，真係勁滿足啦~

由於我地幾位小朋友都係初次接觸歷奇活動，所以就由初階開始玩。依個靚靚車軚陣都算係幾易，所以小小豬都好快手就可以任務完成啦~

之後就嚟到依個類似爬樹嘅活動，相對地依個就比較難，因為小小豬力度發揮得唔係太好，所以爬左四下左右就停止再爬(佢話要留力玩其他...真係藉口多多呀...哈哈哈)~

依個就類似係索橋咁嘅，好考平行力同手眼協調，小小豬表現都尚算OK，係教練一步步指導下都叫做可以成功行到去終點~

嚟到依個銀圈圈活動就可以話小小豬最困難嘅一環，既要手腳協調之外，都要用少少力去支撐身體，當玩到中途時小小豬都已經勁想放棄(佢真係有一刻係想喊咁呀)~

不過好在有教練係旁邊不停鼓勵，又俾好耐心咁教小小豬要用啲技巧，俾左好多宙支持佢，所以最後小小豬都有返啲信人，識得笑返繼續玩啦~

最後到可以順利完成任務添~

最後佢就玩依個BB級索橋，有左之前幾次成功嘅經驗加上又唔係太難，所以佢今次仲超快完添~

當佢去到終點時仲不停讚自己叻仔，真係....何其自戀的豬仔呀~

以初中階嚟講仲有一個繩網橋，不過由於時間關係，小小豬今次就玩唔到啦~

其實...當我第一眼望到個場時，我都有點擔心，始終感覺個場唔算大，係咪真係好似睇官方介紹咁好玩呢？但係旁邊睇小小豬玩又覺得OK，見佢又玩得幾投入，仲話啲歷奇好刺激添。只要佢玩得開心我就滿足啦...哈哈哈！

不過，其實我又覺得歷奇活動都唔錯，既可以訓練小朋友膽量之外，又可以訓練體力，最重要係學識凡事唔可以半途而棄，面對困難亦要勇敢面對。依啲亦都係小小豬需要學習嘅地方，希望佢經過今次歷奇活動可以有所得著啦！