香港人出名鍾意去旅行，一年起碼飛一次是常識吧！嗱，未做人阿爸阿媽嘅真係一年飛幾多次都冇人話你，至多咪畀人羨慕「好有米」或者「真係多假期」，但如果作為新手父母，BB仲係手抱階段就帶佢搭飛機兼去流感高危地方，又有冇必要呢？
近日討論區有網民分享一張Facebook截圖，內容係有個家長喺一個「大阪親子遊」群組徵求意見：「13個月B發燒39度藥妝店冇藥買，話只for 3歲，話要睇醫院先有藥，請問現在可以點做，好擔心」。
樓主覺得案件中嘅家長唔應該帶咁細個嘅BB太細個去流感高危地區，而且只係帶得4次藥咁少，仲要諗住求其去藥妝店買成藥畀BB食，實在太得人驚！
Juicy媽同樓主一樣，唔明點解啲阿爸阿媽會帶咁細個嘅BB去旅行，究竟為咗咩呢？留言見有人分析，可能係因為2歲以下嘅小童唔使買機票，啲父母覺得「免費機票」梗係唔好執輸，又有網民話「好多人都覺得冇理由生咗個B後，自己想去旅行冇得去，所以帶埋BB去」。
其實大部分留言都贊成樓主嘅意見，覺得帶咁細嘅BB去旅行「絕對唔係享受」，除咗要帶大量BB用品之外，「照顧BB嘅時間佔旅行超過一半，行得慢，又冇得瞓，完全冇時間玩。」而且旅程中亦經常要搵育嬰室或者畀個環境BB瞓覺，一啲都唔輕鬆！所以有人覺得應該「等小朋友3歲後先帶佢四圍去，起碼表達能力好啲，有咩唔舒服都識講！」同埋大啲嘅小朋友起碼會有多啲印象，將來回憶返都開心啲啦！
不過其中有兩句留言都提醒咗Juicy媽：「冇人幫手湊BB咪帶埋佢去旅行囉，由得佢畀工人/長老湊咪又大把人話父母掛住玩冇責任心。」、「去旅行本身係冇問題，問題係有冇做足準備。」又有道理喎！無論父母點做，都一定會有人批評，重點係佢哋識唔識做！
好似今次案件嘅家長咁，其實如果佢一早帶定足夠嘅藥去，可能BB食完就退燒，又或者佢有一早搵定當地醫院嘅資料，咁就唔使咁臨急臨忙上網求救啦！而且有網民話佢連應唔應該去醫院都要上網問人，證明佢就算唔係身處外地，喺香港都好大機會湊唔掂BB！你又覺得個家長應唔應該帶咁細個BB去旅行呢？Click入去一齊討論。
最後Juicy媽在此提醒各位想帶 BB去旅行嘅家長，一定要：
1. 帶定足夠平安藥
2. 買旅遊保險
3. 搵定當地醫院資料
