喺forum睇到好多post都係講老公不忠或者出軌，真係愈睇愈心噏。其中有個老公尚未正式出軌，但就係被對方婉拒時講咗嗰句經典對白：「我同另一半已經冇感情架喇。」另一半發現咗之後唔使講，肯定嬲到噴火，或者心淡到不得之了啦。
有個留言好精警：你老公孔雀開屏，今次開到一半就摺埋咗，下次呢？一時不忠已經足夠證明佢身痕，今次食唔成啫，難保下次唔會姣婆遇著脂粉客。但如果要同老公攤牌，就要諗定後路：小朋友點安排？萬一分開生唔生活到？
討論得如火如荼之際，有人話forum呢度日日都教人裝備自己，兼且唔再為個家付出，最好盡早離場止蝕。冇人會諗點樣去做一個好嘅太太，搵出老公不忠嘅原因，嘗試去改善彼此間嘅關係。
咁我覺得兩睇啦，一個女人如果太惡死又唔反省自己嘅，都唔難理解點解男人唔想返屋企。做咗女超人又點？男人眼中同個囉嗦嘅老媽子冇分別。但係反省得太過又唔得喎，冇理由blame the victims架嘛。有啲男人就係身痕鐘意扮情聖，就算老婆做到100分又點，佢都係會出去滾。
最清楚成件事嘅都係樓主本人，而家當局者迷上嚟問問意見，又唔使吓吓教人點做嘅。不過Juicy媽都係極鄙視出軌嘅人渣，個老婆照顧頭家，係畀你無後顧之憂咁工作，唔係溝女囉好冇！
