聖誕節前夕，小JM突然發燒同咳嗽。
Touchwood講句，今次係小JM頭一次咳嗽兼有痰。
起初兩日都係發燒，食完藥退咗，但就有咳嗽，而且半夜仲會咳醒而喊。
一晚咳醒四、五次，似乎啲痰真係令小JM好唔舒服同抖氣唔順添。
本想幫小JM拍痰，但每次拍唔夠幾下就起身走人，想夾都夾唔住，有啲野真係逼唔想。
見到小JM咁辛苦，食藥又去唔到痰，於是就諗住去買龍脷葉燉湯俾小JM飲。
誰知假期過後賣新鮮龍脷葉嘅姨姨仲放緊假未開門，所以只好轉燉其他湯料係啦！
於是就去藥材鋪買川貝母及雪梨乾。
*今次我用嘅燉盎係美的陶瓷蒸燉寶 MD8101F喔！*
食材功效:
川貝母：有效止咳化痰，而且仲有潤肺功效
雪梨乾：有潤肺、化痰及止渴功效，對於喉嚨痕癢有一定幫助
乾淮山：有健脾、補肺、固腎功效
溫馨提示:
川貝母 未必適合每個人嘅體質服用。
誤食的話隨時越咳越厲害，甚至變成喘咳，
所以最好食用之前請教一下中醫師。
材料：
川貝母 適量
雪梨乾 4 片
乾淮山 5~6 片
乾百合 適量
南北杏 適量
紫花果 3 粒（用以代替蜜棗）
桂圓肉 8~10 粒
杞子 適量
做法：
1.) 先將材料以清水洗淨或稍作浸泡，備用
2.) 將雪梨乾鋪於燉盅底，以免浮起
3.) 再分別加入乾淮山、川貝母、南北杏及乾百合
4.) 最後分別放入桂圓肉、杞子及紫花果
5.) 並於燉盅內注加水份至八成滿
6.) 以燉盅慢燉三小時即成
以素食材料為主，湯會更為清徹香甜。
不需額外加入調味已經可以飲用，
清潤之餘又有化痰止咳嘅功效，
適合一家大細秋冬滋潤一番。
