對好多未照顧過 BB 嘅人嚟講，好多時都認為 BB 只會食、睡、痾，依三個動作不停 loop 就得，但當你嘅角式由旁人甲乙丙，變成 BB 嘅爸爸媽媽，就會發現想 BB 瞓得好絕對唔係一件容易嘅事。

初生 BB 胃仔容量細，每餐奶食得好少，當你完成完掃風，再體驗 BB 吐奶、爆片、換片等，到 BB 乖乖自己瞓著覺，媽媽再洗吓紗巾，食吓嘢，正想抖一陣時，BB 又要食奶喇~

如果你身邊有朋友初為人父母，每當良朋共聚時，必定有機會聽到佢哋分享或大呻 BB 戒夜奶嘅成功事蹟或晚晚冇覺好瞓嘅慘痛經歷。

郭師奶係在職人奶媽，戒夜奶對我來講係天荒夜談，因為返工要泵奶，想保持奶量就要返屋企後盡量埋身餵 BB。人奶好吸收大家都知道，依頭食飽，個頭好快又餓，BB 食人奶除咗為咗滿足飢餓感之外，仲滿足埋心理。我唔係一個處事好有規矩，按部就班嘅人，亦冇咁好耐性同毅力半夜多次起身抱起我家阿三同安撫佢，等佢唔駛食奶就再次入睡。我會用我懶人方法解決 BB 半夜哭鬧，就係瞓喺度埋身餵人奶，做阿三嘅人肉奶嘴！

到阿三過咗半歲，到加固依個階段，一家大細可以晚晚瞓得好似乎漸見曙光。糊仔、粥仔比奶飽肚，自然餓醒機會少咗，但原來仲有好多因素影響 BB 睡眠質素。

阿三已經唔再係初生時個團粉團任你舞就滿足，佢開始有自己思想，亦開始用身體各部份探索身邊事物。如果你都係過來人，一定會發現 BB 日抖可以經常自己玩玩吓就自然瞓著覺，佢哋係犀利到任何地點或姿勢都可以瞓著！！

另外，當你抱住/揹住佢行行吓街時，亦不難發現 BB 原來已經瞓著咗！

但係......偏偏一到夜晚，BB 總係久唔久就扎醒大喊，初時你會嘗試聽育兒專家所講，確認唔係要換片/食奶/過冷/過熱一大輪之後，會先溫柔地同 BB 講嘢，等佢知道父母喺身邊；唔 work 就下一步，溫柔地拍吓 BB；再唔 work 就行最後一步，抱起佢安撫佢。不過當你好夢正酣嘅時候要彈起身，不斷反覆做以上動作，個一刻你會覺得係挑戰緊自己嘅人生極限，一邊同睡魔抗爭，一邊氹自己嘅寶貝入睡。

仲有，BB 日頭玩得太興奮，又或者個日接觸到好多人與事，例如去朋友屋企玩，見到好多 Auntie、Uncle或小朋友呀......，嘿！個晚你又隨時冇覺好瞓，BB 好可能會瞓瞓吓「發夢」扎醒搵你！

可能你睇完我打咗咁多字，都搵唔到我分享 BB 瞓得好嘅經驗。BB 有自己嘅本性，同一個方法去照顧不同 BB 未必有同一樣嘅效果，另外 BB 亦唔可能每日只重複在固定地方按照時間表做同一樣嘅嘢，每日佢哋都可能接觸到新事物，不斷從中學習。當你同你嘅寶貝朝夕相處時，慢慢了解佢嘅脾性，亦互相建立感情同信任，BB 感受到爸爸媽媽嘅愛，漸漸唔會感到不安，最後自然能夠瞓得好喇！