如果大家有睇過我之前嘅「瞓得好」分享，又或者你係過來人，都會了解到想BB瞓得好唔係一件容易嘅事。

想BB瞓得好，當然投其所好係最快達到目的嘅方法！今次就探討一下BB鍾意點樣瞓啦~

1. 啜住瞓

吸啜係BB喺媽媽肚入面已經自動學識嘅本能，吸啜可以飽肚(食奶)，吸啜亦可以滿足心理(得到安慰)，有啲BB會啜手指，有啲會啜安撫奶嘴，有啲會搵媽咪做人肉奶嘴！我家阿三曾經搵我做人肉奶嘴，後來我要返工，佢就搵佢最貼身嘅手指公嚟啜，啜吓啜吓就瞓著咗。

2. 趴喺度瞓

當BB學識轉身後，不難發現佢哋鍾意趴喺度瞓，通常碌嚟碌去，碌到咁上下自己瞓著咗，十居其九都係趴喺度瞓著咗，我相信係因為趴喺度嘅感覺同擁抱差唔多，令BB有安全感。

3. 搖住瞓

坐BB車俾大人推住四圍去，又搖又震，BB 好快就瞓著咗。依個方法絕對可以套用到所有年齡階層！不解釋，有圖有真相！

4. 陪瞓

有大人陪住，又攬又拍，再加上溫柔妙語輕歌，集視覺、聽覺、觸覺、嗅覺甚至係味覺(食住奶嘴、手指或人肉奶嘴)，咁有安全感，想唔瞓都難！不過第4點係最辛苦爹哋媽咪，同埋爛瞓家長切勿仿傚，免生意外！

希望大家嘅寶寶都可以瞓得好之餘，自己作為照顧者都一樣可以瞓得好！