小獅媽同小獅爸都好中意去旅行，不過有左小獅妹後，

去旅行無論地點，時間同行李都要經過深思熟慮。

而小獅妹頭幾次去旅行，我地都決定小試牛刀，近近地去台灣，

去台灣只需要一個鐘多d機程，所以好岩比bb試搭飛機。

當我地決定要帶小獅妹去旅行，其實家中4大長老，同一d親戚都好反對，

覺得bb咁細個都唔會記得去過旅行，又驚bb搭飛機會喊，

但當你真係帶bb去旅行，你就會發現，bb係旅程中係幾開心，仲會突然覺得佢成長得好快。

小獅家第一次旅行係去花蓮，囡囡去到好似發現新大陸咁，無比興奮。

佢對任何花蓮既事物都表現得好新期，好雀躍。

而我今次推薦既花蓮好去處就係太魯閣國家公園同清水斷崖，

雖然風景係好靚，不過要提提大家，

呢個行程係要上山嫁，絕對唔係一個舒服既行程，

如果如果一家大細咁去，最好就包車，

因為bb想訓覺換片食奶，你都會係車上進行。

講返呢2個景點先，雖然就話係行山，

不過好多時都係坐車到一個位置，之後落車行一段路再影下相，

當日我全程揹住10個月大既小獅妹，前前後後都係行左2.5-3個鐘左右，加1個鐘午飯時間。

小獅妹每次落車，都好開心，始終係香港好難會見到如此美景，

真係整個山都圍繞住我地，有河流有水，仲有吊橋，

小獅妹雖然未識講野，不過沿途佢不斷指周圍既事物，

對任何事都充滿好奇心，我相信對小獅妹黎講，當日一定係一個好特別既行程。

所以去旅行可能bb將來未必會記得，但當下佢一定會覺得開心，而且係一個與眾不同既體驗。