記得初為人母，對住每日只會食瞓痾嘅寶貝，只要每次發現佢瞓緊嘅時候無端端一笑， 自己就算再辛苦都會覺得係值得，會繼續夜以繼日瞓身照顧佢。

到BB有意識去笑之後，每日逗佢一笑成為我每日生活嘅最大動力，就連返工泵奶嘅時候，睇住手機入面BB開心笑嘅相，奶量都會升多啲！

到佢識行識走，牙牙學語，除咗喺父母懷抱入面會好開心之外，仲會有好多嘢令到佢開心笑，包括為食嘅佢見到好味嘅嘢食啦，睇到網上其他可愛BB開懷大笑嘅短片，有新玩具玩......等。

唔計親親daddy mommy，當BB不斷成長，佢哋會不斷探索呢個世界，活動範圍唔會再局限喺佢張BB床，之後會周屋走，好快仲要日日去街街。

我有三個活寶貝，共通點都係痴住我同老公時笑得溫馨滿足外，可以衝出屋企，盡情咁玩，盡情跑跳嘅時候係笑得特別燦爛。

雖然細女仲未返學，未面對過讀書學習嘅壓力，但我會不時提醒自己，我當初生佢時最基本嘅期望係乜，就唔會俾自己做虎媽。

我希望自己嘅孩子個個都健康成長，做個每天笑得好嘅快樂人！