小朋友嘅世界好簡單☺️

芯媽係芯芯未岀世時，已經同芯爸有一個共識。

就係希望我地嘅bb「永遠開心」?

不論佢高矮肥瘦，成績高低與否，我地只係希望佢健康快樂。

而又好慶幸，係我地婚後嘅同一年，芯芯就隨即到來?

我同芯爸好快就對改名有共識，取名李穎芯-「祝你永遠開心」。

唔知係咪bb真係明白爸爸媽媽嘅心意，係佢岀世第一個月，佢就已經對住我地笑。

個一刻我同自己講，我一定會堅守呢一個笑容，唔會俾光陰偷走佢！

雖然我係一個全職媽媽，但我同芯爸都非常珍惜同芯芯相處時間。

我地深明一個道理，就係更多嘅物質享受都比唔上一個有愛嘅擁抱。

芯芯係一個好簡單而又好愛笑嘅bb。只要有人伴佢玩，好少嘅事佢都可以笑一餐。

但如果你只係單單俾玩具佢自己玩，再好玩嘅玩具佢都唔會覺得有趣。

其實小朋友只係希望你可以倍下佢。

佢只係希望同佢喜歡嘅人玩玩具。

曾經有人話過，隨住年紀愈大所展露嘅笑容就會愈少。

我知道芯芯都會有呢個階段，但願芯芯長大後都依然係一個愛笑嘅人。

遇到唔開心嘅事都會搵媽媽傾訴。?