呢個題目其實唔止小朋友，好多大人都好有興趣知。畢竟食得瞓得又屙得係人生天樂事，我今次就先寫初生兒點先poo得好啦。

好多初為人父母嘅除左食，最緊張就係小朋友屙果餐。無他，食得屙得自然瞓得好，環環相扣缺一不可。我自身經驗加上各位喺左近嘅醒目媽媽經驗之談，要初生嬰poo得好，最佳方法就係：人奶！

人奶易消化，世衞話係六個月或以下嬰兒嘅最佳食物。但未必個個港媽都餵到全人奶，返工嘛，產假有得休息都抖下啦係咪？我明白，但人奶真係餵得幾多得幾多、餵得幾耐得幾耐，唔單止係我個人經驗，仲有好多其他媽媽嘅經驗之談。

我個女好曳，邊食邊屙「無衣食」仲要人奶B屙個濕屁就唔食，結果當然一日廿餐奶廿餐大便仲加埋爛屁股。但佢從來無腸胃問題，講緊嘅係飲人奶果兩年，除左病時食抗生素會肚屙下之外，佢到今時今日八歲幾，大便都「暢通無阻」。我諗係人奶俾左佢腸道一個好好嘅環境佢，唔會咁易敏感或肚痛。

但每個人奶BB嘅大解並唔一樣。我表弟一樣全人奶，但佢好慳家，一星期先屙一次，嚇親父母要帶佢去睇兒科醫生。兒科醫生解釋：「只要佢係全人奶BB又無便秘問題，一星期一次都無問題。」佢係吸收得好好，而家大個左亦無腸胃問題，係健康好寶寶。

成日聽到奶粉寶寶有唔同嘅poo poo問題，其實人奶BB嘅poo poo習慣都未能一概而論，何況食過百種不同品牌奶粉嘅小朋友？所以首六個月，媽媽為寶寶好、為自己修身好、為親子好，餵得幾多得幾多人奶實在係唯一最好令BB屙得好嘅方法。唔好計咩奶量之類俾壓力自己，小朋友飽就夠，唔飽或者要返工俾奶粉亦唔係惡魔，不過既然人奶寶寶無咩腸胃問題，我地做媽媽嘅又何樂而不為？盡做囉，香港人精神嘛。