【小JM料理台。腸道問題。通便湯水】

小JM媽我從小到大腸胃都屬於敏感型，稍為食到一啲不潔或油膩嘅食物時就會好容易出現肚瀉嘅現象，嚴重嘅有時仲會引發成腸胃炎添。

 

係孕期嘅時候，小JM喺我肚入面個陣醫生曾經照到小JM腸道有光影，

所以成個孕期都需要照超聲波去監察小JM既腸道健康問題。（政府同私家兩邊走。。。）

而小JM出世個陣仲即刻被送去NICU留院觀察咗一晚，要到第二日嘅中午先可以返來我身邊。

初生時期，小JM都好努力，所以我地都無遇到特別問題。直至到小JM開始加固之後，問題就慢慢開始浮現啦。

明顯地見到小JM加固後去便便嘅時候比較辛苦，但事實上小JM嘅膳食一直都係多菜少肉，而且小JM每日都會飲足夠嘅水添。

眼見小JM因為去便便而攪到坐立不安同大喊，當媽嘅又點會唔擔心。

為咗可以緩解小JM去便便嘅問題，亦試過好多唔同嘅方法，簡單如按摩肚仔及飲用益生菌一樣試過。但好可惜，問題依舊存在。

 

講真，每當見到小JM因為去便便而攪到喊晒嗰陣，個心真係好痛，亦覺得好自責，因為可以做嘅都做晒，但仍然幫唔到小JM舒緩不適。

為咗可以有效地舒緩便便問題，我決定再次喺小JM嘅飲食方面著手。結果小JM嘅問題終於有所改善，去便便個陣唔再喊晒口，媽媽我亦終於都可以鬆一口氣。

保持腸道健康小提示：

－　多進食各類水果、蔬菜、豆類、果仁、全穀類食物，攝取多啲纖維。

－　進食酸奶、乳酪及經過發酵嘅食物有助促進腸道健康

－　最重要當然係要飲多啲水

【印度椰子紅蘿蔔粟米雪耳百合湯】

唔好以為呢個湯好普通無咩特別，其實每樣湯料都對身體好有益處架！

適合男女老少飲用，而且清潤得來唔油膩，湯渣都啱小朋友食。

印度椰子：化痰止咳，潤肺清熱，滋陰養顏之效

紅蘿蔔：　健胃養肝明目。

粟米：　　利尿去腫退黃、降血糖及膽固醇

雪耳：　　補脾開胃、益氣清腸、養胃生津、滋陰潤肺

百合：　　潤肺養陰、止咳及清心安神作用

材料：

印度椰子　一個

紅蘿蔔　　一個

粟米　　　一條

雪耳　　　半朵至一朵

百合　　　適量

瘦肉　　　

南北杏　　適量

蜜棗　　　一粒

做法：

1.)　預先將雪耳以清水浸泡約三至四小時。

　　浸泡後可將雪耳蒂除去並切成小塊。

　　南北杏、百合及蜜棗以水浸泡或清洗，備用。

2.)　印度椰子、紅蘿蔔及粟米先洗淨並切成小塊，備用

3.)　將瘦肉稍作清洗再汆水，以除去多餘油份，備用。

4.)　預先煲滾一煲水，再將湯料逐一放入。

5.)　煲約個半小時即可。

你又有無咩特別嘅方法或建議可以幫助小朋友減低便秘嘅問題呢?

有嘅話不妨一齊分享一下呀!