希希剛好一歲, 我一向都好少擔心佢去便便嘅問題, 因為希希由出世至今一直都保持食媽媽新鮮嘅母乳, 母乳可以減輕腸胃負擔(特別係早產BB), 所以希希一般都可以保持每日有1-2次大便. 

半年前開始加固體食物, 我都有個小秘訣可以令BB便暢通無阻, 想同大家分享下, 就係早上第一餐除左比人奶之外, 我會比佢食最簡單的水果及米糊, 先打開腸道, 就好似大人食飯之前食沙津一樣, 到中午先開始有菜類肉類, 因為小朋友多數最多活動時間就係下午前時間, 所以多活動, 腸郁多左自然就有便便, 希希一直都用呢個方法, 都無大問題

當然希希都嘗試過生病, 打針胃口唔好, 最長果次係三日無便便, 我就係希希沖涼後, 幫佢輕輕搓下肚仔, 第二日早上又搓下, 咁之後就好成功POO左出來啦, 不過果次份量真係唔多, 所以令我明白食得小就自然無得去便便, 唔須要太焦慮

好明白媽媽當自己仔女無便便都會心急, 我有D食物同大家分享, 未加固的, 真係無便便, 就比小小溫水比BB飲, 加固後嘅小朋友, 可以每日都食下呢D食物, 就好似士多啤梨, 香蕉, 蘋果, 西梅都係好得架 ! 因為呢D食物果膠同纖維都較多, 可以令大便變軟都會POO得好好多

有次跟人地爸爸分享, 佢教我, 如果一歲以上的小朋友無大便, 可以嘗試蜜糖水, 佢話萬試萬安靈 ! 不過呢個都係參考, 每個小朋友都有唔同狀況, 做父母的, 無人比你更了解自己仔女, 所以自己應該衝量BB個人情況去嘗試啦