小朋友有自己嘅大便習慣，其實我問過好多媽媽，一歲後BB食左半年大人野大概大便會有自己嘅規律。有啲一日兩次：有啲一日一次；有啲兩三日一次。

只要大便軟身而且無排便困難，就算兩三日一次都唔駛太擔心。相反一日兩次但屙鐵蛋，咁就要注意喇。多飲水，食夠生果同菜，一般都唔需要太擔心。要注意嘅係食左新食物後有無排便習慣改變，因為呢樣反而係好多父母會忽略嘅地方。

以我自己個女為例，佢有食物敏感，喺未知情前食左致敏食物的話，佢都會有腸胃不適嘅情況出現。初時我地未察覺，到佢出濕疹時先知道，都遲左一步。女兒另一個好友大大下都有食物敏感，食親麩質落肚都會絞肚痛，媽媽懷疑佢有食物敏感結果發現左，戒口後就無肚痛問題。

所以便便真係講到好多野俾人聽，我地要細心觀察，仲要有時唔好自己嚇自己。我個女而家會知道早一兩餐食左蕃茄、紅蘿蔔或紅菜頭等等會有紅色喺便便入面，佢唔會再驚係自己係屙血而大叫。我地做父母嘅，有時見到小朋友幾日無大便就面青，但請細心想下：佢早幾日食咩？有無食足夠生果蔬菜？有無病？食嘅藥會唔會令到佢有排便改變？比如一種好常見嘅藥會改變排便習慣但好多父母會忽略嘅：抗生素！

抗生素實在太平常，平常到每個人平時傷風敏冒都有機會食番一兩個療程。但你地又有無注意到小朋友甚至大人，一食抗生素，排便習慣會改變？

有啲小朋友一食抗生素會肚屙，咁呢啲時間你要小心，要補充足夠水份，亦要聯絡開藥嘅醫生報告番，睇下有無問題。一般肚屙係唔會令小朋友屙到脫水嘅，但要食抗生素五至七日的話，腸道益菌失衡，肚屙係會有可能出現嘅情況。

有啲小朋友相反，一食抗生素就無大便，咁亦係腸道益菌失衡嘅現象。無論肚屙定無得屙，我都會喺食抗生素嘅時間同埋之後嘅一星期，補充番益生菌俾佢。咁可以「種」番啲益菌落腸，幫助排便，腸道健康自然人都醒神啲。

久而久之我自己都有埋呢個習慣，發覺對自己都有益，而家一病要食抗生素時我都會補番益生菌俾自己，好好保養腸胃。

另外有時小朋友只係咳，咁大人會同佢戒下口未必有生果食，咁都要注意番纖維嘅補充幫助排便。只要細心觀察，小朋友嘅poo poo自然路路暢通，父母放心啦。