想 poo 得好，先要打好個底，就係由出世開始飲「媽媽牌」奶。

相信冇人會反對母乳是最天然最易吸收嘅，母乳仲有媽媽嘅抗體，令 bb 離開媽媽成為獨立個體之後，仍然可以透過母乳令 bb 對抗病菌。

再講多少少母乳吸收嘅話題先，以前我上網搵資料，有人話因為母乳好吸收，冇多餘營養，所以可以幾日都冇便便；亦有人話，母乳水份多，當中某啲成份令 bb 腸道保持健康暢通，所以可以日日有便便，甚至多過一次添。

究竟邊樣先係真呢?答案係兩樣都真㗎! 當我生咗三個寶貝，就發現一個可以4、5日先 poo 一次，另一個可以日日有得 poo！真係估唔到呢！所以當你嘅人奶b 日日 poo 或幾日先 poo 都係正常㗎~

雖然母乳是最好的，但要做人奶媽一啲都唔易，亦有媽媽因健康問題未能夠持續餵母乳，結果bb 要飲配方奶。今時今日嘅配方奶林林總總，營養充足，亦模仿母乳成份，務求令 bb 易吸收同 poo 得好，但始終有部份營養唔可能完全吸收，例如過多嘅鐵質吸收唔哂有機會造成便秘，所以當 bb 開始加固時，要俾佢飲足夠嘅水，一步步添加含豐富膳食纖維嘅食材，為 bb 建立健康嘅飲食習慣。

最後，我分享一個令 bb poo 得好嘅好嘅輔助方法，就係按摩肚仔，按摩最佳時機係餐前或餐後超過一小時，bb 唔好過飽過餓，室內保持溫暖，大人手掌要溫暖，按摩用適量 bb 按摩油，溫柔地由 bb 肚仔 7點鐘位置推上去，順時針方向推到5點鐘位置，如是重複幾次，bb 既享受又幫到佢腸道蠕動，poo 得好仲可以增進親子關係呢！

我家阿三識行識走都仲好 enjoy 我幫佢按摩肚仔㗎~ 你哋都試吓啦~