魚蛋頭poo poo篇

話說魚蛋頭都已經15個月大啦，時間過得真係快(๑>ᴗ<๑)。自從魚蛋頭出世開始，魚蛋媽都一直留意住佢d臭臭係點。魚蛋頭0～6個月嘅時候，佢d臭臭係炒臭蛋咁嘅味（●≧艸≦，顏色係健康嘅黃臭臭。

但係當魚蛋頭6個月打後就開始食副食，魚蛋媽就會更加留意住佢d臭臭嗱，因為食副食開始就係腸胃要慢慢適應一個新環境。由奶類嘅液體慢慢轉變成濃稠，再變成完整大人飯食物嘅質感。起初我都幾擔心魚蛋頭唔適應，但係好在佢好似想慢慢脫離純奶奶，所以由米水、粥仔、生果泥、蔬菜泥、肉泥開始，再進一步混合各種食材。當魚蛋頭初初接觸副食嘅時候都有d消化不良肚仔漲漲，poo得唔係咁暢順，d臭臭仲好唔健康添，搞到魚蛋媽鬼咁擔心。咁魚蛋媽就畀咗d益生菌魚蛋頭食，等佢個腸胃郁得好d，咁佢poo嘅時候都唔使咁用力。

如果想要bb poo得好，魚蛋媽建議食材質地方面都係選擇循序漸進比較好，由稀釋到濃稠再到實體，等腸胃有個適應期，以免消化不良導致bb唔願進食。如果一開始畀太大舊嘅食物，腸胃又消化唔到嘅時候，咁bb poo poo嘅時候就要好用力，咁就辛苦咗bb就唔好啦。╭(╯ε╰)╮最後附上魚蛋頭揸羹食飯。