魚蛋頭poo poo篇 續集

上一篇講咗魚蛋頭點樣食得好又poo得好ꈍ .̮ ꈍ。魚蛋頭poo得好真係好重要，尤其是當佢發燒嘅時候(хдх)。因為bb仔嘅汗腺仲未發展完善，所以poo poo都係其中一個主要的散熱途徑。

自從魚蛋頭打疫苗開始，每次都有發燒(⋟﹏⋞)。Touch wood，好彩每次嘅發燒都係1日貨仔，真係謝天謝地 ´･ᴗ･`。魚蛋頭嘅退燒方法就係冷敷、溫水抹身&飲1大支母乳，最後就poo 一督勁大臭臭，咁就即刻退燒。大家都知道冷敷&溫水抹身都係常見嘅物理降溫法。但係對於魚蛋頭嚟講飲一大支母乳就係最work嘅。因為母乳嘅成分係最易畀BB腸胃吸收，咁魚蛋頭飲咗之後可能腸胃嘅蠕動快咗，就會好快咁可以poo督大臭臭，之後體溫就會恢復正常啦ლ(･ω･*ლ)。

仲有一段時間魚蛋頭超級沉迷食提子同橙，每日都食十幾粒提子同一個橙。食生果係好，但係過量就未必。果陣時魚蛋頭poopoo明顯次數密左同稀左，搞到用多左好多尿片（好貴）ಥ_ಥ，而且patpat開始出紅疹(;´༎ຶД༎ຶ`)，所以魚蛋媽都當機立斷即時減輕水果量，過幾日便便即時靚番晒，魚蛋爸都冇咁心痛（尿片方面）。

當魚蛋媽仲係女嘅時候真係唔會咁得閒睇屎。有咗魚蛋頭之後就日日同屎尿屁打交道(˶‾᷄ ⁻̫ ‾᷅˵)。在此要借機向各位媽媽致敬，媽媽之路不容易，互勉之。