今次講下小朋友唔同情況瞓唔好嘅原因，有啲有得解，有啲無解，所以要事事關心，事事放鬆。
有客到：
有客人嚟，尤其是有同齡親友，總係玩得好開心。即使人客醒目準時閃，留低嘅仍然會回味無窮。就算睇埋書刷埋牙熄埋燈小朋友仲眼光光甚至不斷同你講好開心十萬次（佢地詞窮，原諒佢地）佢都毫無睡意。點算？
大人都會發生，我會做完睡前必做幾件事如刷牙閱讀後，同佢傾多五至十分鐘，之後關燈收聲。唔可以唔講，因為太興奮，小朋友發夢都仲會發番當晚事出嚟，要放番啲回味無窮嘅精力出嚟先可以安然入睡，所以呢刻無得忟，亦可以彈性啲將睡覺時間推遲十至十五分鐘當加班。
出左街：
有時出左街，比如睇完聖誕燈飾或煙花，返到屋企個腦仲閃閃下，即使回程時瞓左，一返到屋企你幾小心輕放小朋友佢都會雙眼好似去完飲見到隻乳豬雙眼咁精神。點算？已經過左恒常入睡時間一小時或更多喇（媽媽仲未落粧未執袋未洗奶樽明天要返工……總之好想殺人）。唔駛驚，若果知佢會因晚睡肚餓就俾少少小食佢食左先，做番睡前幾件事如刷牙閱讀，再關燈若無其事咁瞓。記住，「若無其事」係精要之處，因為入睡係一個learned reflex，你做足入睡三寶（刷牙閱讀關燈）佢就會收到訊號，就算因為被煙花煙親或燈飾閃親個訊號有delay，都係一個訓練。一樣俾啲耐性，因為小朋友並無選擇去咁晏，父母唔好忟，件事就會順利啲。
出門住酒店／民宿：
呢家算係最高級，過埋呢關父母基本上可以打大佬。唔好講小朋友，大人去左新地方都要欣賞一下間酒店睡下特軟牀褥啦，何況有新奇baby cot嘅小朋友？唔肯瞓或瞓唔好是正常吧？我喺呢方面就會犠牲自己朝早時間求一晚好睡，意思係盡量早起，和小朋友吸收陽光，晚黑前小朋友放電夠足，就會無電入睡。而且最大可能係因為「生寶」牀，小朋友半夜會起牀，我多數會預訂king size大牀酒店，直接把小孩子放上大牀睡。雖然這個好像「斬腳趾避沙蟲」，但去得旅行我會chill啲，唔好因為睡不好而破壞大家雅興。
溫馨提示：以上資料係由媽咪提供作一般性參考，並非專業嘅醫學意見。
