每個家長都想小朋友快樂地成長，而每個小朋友亦想家長多點陪伴玩耍。作為雙職家長，信心媽好明白放工回家仲要做家務和處理各大小事情時，都未必有時間和心力再同小朋友玩，但其實一些小遊戲都已經可以令小朋友笑到騎騎聲！提供以下六個小遊戲供大家參考下(部份有影片參考)！
1. 捐山窿
只要坐在梳化，雙腳稍為預留位置讓小朋友在中間穿過，唱埋London Bridge Is Falling Down或有隻雀仔跌落水！已經係一個好開心既遊戲！就算得一個家長都玩到，而且過程中仲可以坐住梳化(兼望住電視！不過我建議還是專心陪玩！)佢哋最開心就係最後被人夾住啦！
2. BuBu唧
個個BB都玩BuBu唧，唔通真係個個都鍾意玩BuBu唧咩？正是！真係無咩邊個小朋友唔鍾意，一唧就笑唔停，萬試萬靈！唔信？今晚返去試吓啦！
3. 「跌跌」
又係一個可以坐梳化玩的遊戲！小朋友面向爸爸媽媽坐係大脾上，然後等佢向後跌，再上番黎，當然要捉得好實免得佢跌襯！同埋都要小心整親佢條頸，每次玩2-3下好了！
4. 拋高高
與「跌跌」相反就是拋高高！用雙手把小朋友拋向高處再接番佢！同樣要小心千萬咪跌親小朋友，但此舉需要雙臂有力人士負責，小朋友年紀較大亦難以拋高。
5. 人肉滑梯
又係一個可以坐梳化玩的遊戲！只要伸直雙腳，讓小朋友滑下便可！雖然條「滑梯」相當短，不過佢哋仍然樂此不倦！雖然信心媽成日擔心雙腳會斷，不過至今仍然安然無恙！
6. 飛機
這個遊戲適合在床上進行，首先爸爸或媽媽找一個舒適的位置和姿勢瞓好，然後曲起雙腳，小腿與床成水平，造成「停機坪」後，小朋友就可以扒在膝蓋以下位置，父母可以用手支撐和扶穩小朋友，然後就可以提高小腿讓小朋友起飛！此遊戲可以一邊娛樂小朋友一邊當做運動，一舉兩得！(類似圖中姿態但雙手扶實小朋友)
希望大家都可以一起騎騎笑啦！
https://www.facebook.com/shunsumjourney/
https://shunsumjourney.blogspot.hk/
