小朋友點樣笑得好我寫到第三集原先想收筆，但上星期聽完陳廷三博士講座又忍唔住八番啲俾大家聽。
陳廷三博士係邊個大家上網查下就知，我唔識佢，人地又係教書，唔係做生意無謂賣廣告。佢講嘅野先係重點：小朋友係要依附住照顧者先可以健康成長嘅，而照顧者未必係父母（今時今日父母工作確實太忙），可以係老人家或工人姐姐等，但大家必須要有一樣野做得到小朋友先笑得出：適時回應小朋友需要。
咩叫適時回應？咩叫需要？BB仔滿月無耐好多父母好大壓力：產假用得七七八八但個曳豬仲未戒到埋身餵奶 / 唔肯用奶樽食奶 / 晚黑仲係不停起身 / 食完奶換完片唔肯瞓又扭抱又扭玩，總之越夜越美麗咁款……to cuddle or not to cuddle? 呢條係一百萬問題。我有幸當年有好友早半年分娩，佢同我講：BB咁細鬼識扭計咩，唔會有咩壞習慣寵壞左架，佢喊，抱下囉，佢地連日夜都未識分，怕黑都唔奇，得鬼閒扭你計咩。講呢句說話嘅仲要係雙職wonder woman，我至今感激不盡。抱呀抱呀抱呀，原來就係適時（佢喊或叫你時）回應BB需要（佢怕黑 / 唔慣自己一個瞓牀 / 屁股濕左 / 腸動 / 放屁⋯⋯）唔好問點解，唔好比較人地啲仔女滿月戒奶，每個人都有差異，你個小朋友咁細，鬼識因爲你就嚟放完產假而戒奶瞓天光咩。呢個時候，深呼吸，同自己講：我呢刻係BB嘅照顧者，回應佢需要啫，唔係要佢十八日大好似十八歲咁生性。然後查片 / 餵奶 / 探下熱摸下背做返常規野，BB瞓左都識笑。
學前小朋友嘅照顧者有責任滿足小朋友嘅需要，但亦要識得管教。呢個級數當然考工夫，而且小朋友一生人嘅價值觀就係呢個時間建立，唔縱容但又要適時回應其需要真係唔易拿捏。小朋友若果一旦認定你係佢日常照顧者，根據陳廷三博士講，小朋友就會黏住佢成長。只要照顧者管教得好，又回應佢需要，小朋友自然笑得好。
到小學嘅小朋友，好多時照顧者同父母都會有「佢地讀書喇喎，大個仔大個女喇喎」咁嘅錯覺。係錯覺，因為講真，就算佢地九十九歲，都仲係我地仔女嚟嘛。照顧子女，關心佢地，適時回應佢地需要係無分年紀架。當佢地喺學校有挫折，可能係成績唔好 / 俾同學笑 / 打架 / 因頑皮被責罰⋯⋯教訓完，錫返抱返都要，我地都往往忽略左，無辦法，佢地牛高馬大喇曉行曉走，好易令父母有掩眼法覺得佢地唔再需要我地攬下錫下。
「會唔會令小朋友變成大唔透嘅BB架，咁大個人仲要抱要呵？」好多人會有咁嘅疑問。講真我個女都只係得八歲，我唔可以實牙實齒講點點點，但根據講座講者嘅說法，家人，係一世嘅關係，小朋友，係父母生命嘅延續而且唯一嘅證明。唯一？我地有結婚證書有聯名戶口有樓有車大把證明喎⋯⋯sorry，唯獨是小朋友，係我地不能確切以一分一毫分得返出嚟，比如眼呢其實有37.545928%似爸爸鼻呢有78.2957251%似媽媽嘅一種「資產」。小朋友係父母生命合一嘅唯一證據，就算父母分開左，我地都唔可以將小朋友「還原」或「變賣」兩份分開。既然「大洗濕左個頭」，為人父母者惟有共勉，繼續窮一生精力諗下點令家中豆丁「笑到最後」啦。
