小朋友點樣笑得好（三）
-作者: TT
得老爸提醒，有一反面教材開心「些牙」俾大家。
我五歲時媽媽生最小的妹妹，帶回家後想是剛滿月吧，因為坐月又要照顧我和大小妹子，她難得抽空到家樓下的髮型屋電髮。結果一回家，那餐晚飯可苦了。我和妹妹爸爸們邊吃邊竊笑，媽媽抱着剛滿月的傻妹行又唔係企又唔係，總之她由頭喊到尾既不肯吃奶又不肯睡覺。
原先媽媽以為強烈的電髮水氣味不佳令到剛滿月妹妹不滿，但後來幾小時過去她扭盡六壬妹妹都只是哭，才發覺：「哎呀原來佢唔認得我呀，陰功，我電左髮。佢望我兩秒又喊，望兩秒又喊，以為唔見左老母俾人拐左呀陰功。」
我地三個食緊飯嘅梗爆笑，老老實實當年啲街坊髮型屋對易容喬裝呢方面認真出類拔萃，唔好話我果個豆丁妹，我諗連我老豆返到屋企用鎖匙開到門入屋見到個麥當勞叔叔咁款嘅人喺廳都要望多幾眼先認到個老婆。果刻我地除左笑仍然係笑，結果老母果幾日勁洗個頭等個麥當勞叔叔塌番落嚟，但我個妹仲係嬲爆爆左好耐。
套諸今時今日，照顧者可能不止靚媽，更有陪月、外傭、祖母等人。根據我媽媽憶述，我地三姐妹笨唔係個個都咁精叻一滿月就認老母嘅，但明顯地有啲BB係好鬼picky。所以若果工人或老人家忽然有日話BB好扭計係咁扭計喊而且唔肯笑唔肯跟個照顧者，父母又揾唔到原因，唔該睇番先前我嘅《小朋友點樣笑得好？（二）》揾下自己係咪換唔覺意左香水/眼鏡/髮型或去左邊度換左個look。工人都係，有時佢地放左假剪左頭髮返嚟BB會唔跟佢地，唔好怪佢地，只係改左形象啫，BB要時間適應。
所以洗盡鉛華呢家野，唔係淨係明星嫁入豪門先有。只要你係媽媽，你就明白，小朋友對咩都好敏感，為左保護你自己，果啲閃到全間餐廳都眼盲嘅鑽戒鑽耳環…都係喺BB啲手亂咁抓時俾保險箱戴啦，唔係耳珠都抓甩你就慘。大家共勉：「唔好做多左。」已經令BB笑得燦爛。
