轉眼間Clarice已經差唔多三歲，見到佢而家食飯食得咁好，好叻囡咁自己食哂成碗飯，食完仲識飲啖水，媽媽我真係要大嗌一聲：好～感～動～ 唔好睇佢而家咁乖乖食飯就以為佢一直都咁鍾意食野，背後其實係經過一段漫長嘅血淚史……
回想最初Clarice開始可以自己拎餐具食野時，我都放手畀佢自己食，因為睇好多資訊都話放手畀小朋友試，佢哋會更鍾意食野，同埋小肌肉發展呀，手眼協調能力呀都會好d，咁媽媽我緊係跟啦，但點知原來唔係話放手，小朋友就一定鍾意食架，好似Clarice咁，我一直懷疑佢嚟依個世界係想練仙！
佢每餐都食好少好少，有時食一半就唔食，一係就慢世魔王咁，拎住隻匙羹撥嚟撥去都唔放入口，到終於肯放啖飯入口又唔肯吞，一路含住真係激死媽媽，有時忟忟地我都會拎返隻匙羹餵佢，但都係無用，唔食就唔食，講真，當時係好氣餒嘅，一來擔心佢食咁少唔夠營養唔長肉，二來花心機煮但囡囡唔欣賞⋯⋯不過到後來諗通咗，既然改變唔到佢，就試試改變自己心態，其實只要佢喺生長線正常範圍內，健健康康就得啦，然後，慢慢慢慢，Clarice竟然鍾意咗食野！
總結我嘅經歷，如果你屋企都有個練仙小孩，我建議你可以咁做：
1. 煮多D唔同種類嘅食物
相信好多媽媽都有咁做架喇，試多d唔同食材，最好可以每日都換款式，而型態都要成日變，即使係同一種食物，今次佢唔食，但下次變個大細、軟硬度佢又會肯食！我好感恩嘅係，老公支持我做全職媽媽，所以我有好多時間照顧Clarice，可以跟住唔同BB食譜學整野食或者焗下蛋糕，試咁多樣總有一樣係佢鍾意食嘅！
2. 唔好強迫，真係唔好強迫
無人鍾意俾人迫嘅，所以無論我有幾想Clarice食多一啖，一啖都好丫，但只要佢清楚表達佢唔想再食，我就會收起食物。我寧願今餐食少一啖半啖，都好過以後諗起食野都係被強迫餵食。
3. 閉上耳朵
實有好多人話”點解你個囡咁瘦架，你畀咩佢食架？”或者”嘩！佢食飯慢成咁，你都由佢呀？”依d我通通當耳邊風，我24小時對住囡囡，一定係最了解佢，知佢鍾意食咩，知佢飽唔飽嘅人，閉上耳朵，唔好被其他人嘅無心說話影響到。
4. 無比耐性
最後亦都係最重要嘅一點，做媽媽真係要無比耐性，慢慢試慢慢氹，好似傻婆咁喺佢面試用浮誇表情食飯，同佢講好好食，陪佢一齊食，相信有朝一日，佢一定會愛上食飯！
溫馨提示：以上資料係由媽咪提供作一般性參考，
