自家製中秋節BB月餅
-作者: Timtam媽咪
中秋節就快到喇！Timtam媽咪好鍾意食月餅，最近睇BB食譜書時發現，原來有BB都食得的月餅，只要自己動手整比BB食就得喇！Timtam仔第一年過中秋節，我好想與他一起感受一下中秋節的氣氛，一家人一起食月餅玩燈籠，真係好開心架！而且個月餅好容易整，材料又簡單又健康，如果有大一點的小朋友更可以一起整架！等我分享一下整作方法啦！
要買的工具和材料有2樣：
⭐工具 – 月餅模
首先，最重要是去買一個月餅模！基本上很多烘焙店都有得買，fb都有好多架！我就去我買開的一間烘焙店，買細個大約50g就足夠了，BB手仔拎到又容易食！
⭐材料：一個紫蕃薯
一個黃蕃薯
由於係比BB食，主要的材料就係蕃薯喇。BB六個月大可以食蕃薯蓉架喇！最好BB之前都食過蕃薯，確保冇敏感就放心食啦。呢個份量可以做到4個月餅！
⭐整BB月餅步驟：
- 先洗淨好蕃薯，去皮
- 將蕃薯切片或切角
- 䣓水蒸大約15分鐘，可用筷子試下刺穿蕃薯，睇下係咪已經煮至軟身
- 用壓蓉器壓成蓉，用鐵义亦可
心得分享：
❌唔好加水再用攪拌器攪，會太軟身做不到月餅型狀
❌不加任可調味
- 用磨容器壓成蓉後的樣子
- 再把蓉過BB磨容器或筲箕
- 過筲箕後的蕃薯蓉樣子，質感變得很細滑適合BB進食
【秘】呢個步驟一定要做唔可以懶！因為我試過唔過筲箕的月餅會容易散，月餅型冇咁靚！而且一些顆粒未壓成蓉，BB食左會容易啃親
- 用一張保鮮紙，取適量蕃薯蓉包成一個波波
- 包成波波型，大約一個乒乓球般大
- 將黃薯紫薯都分開搓成球型
- 取黃色蕃薯波，用手指壓扁成凹型，取紫色蕃薯波放在中間，慢慢將黃薯波包住紫薯波，二合為一成為一個大薯波
- 另一做法就係紫薯波包住黃薯波，然後放入月餅模
- 用匙羹將月餅壓扁，將番薯波填滿月餅模
- 大力將月餅模壓出，即成！
【秘】記住最緊要壓實，慢慢壓出月餅，月餅上的花紋先會靚
如果將黃薯放中間，驟眼睇就好似鹹蛋黃一樣，係咪都呃得下人呢？
你睇下Timtam仔真係成個食哂架！
希望大家鍾意我呢個分享啦！如果你有大啲嘅小朋友，可以用來做親子烹飪架！呢個BB月餅真係又容易整、又好玩，同小朋友一齊整佢哋一定覺得好有滿足感！
如果你鍾意我呢次嘅分享，請俾個like我啦！用咗好多心機去寫呢篇文架！
溫馨提示：以上食譜只供媽咪參考。每個BB嘅身體狀況同需要嘅營養都有所不同，不妨向你嘅醫生或專業醫護人員先了解BB嘅需要啊！
