講開笑，邊個唔想家中孩子日日笑？但奈何每個小孩性格都大不同，好似芊嶠家姐和劻霖細佬，就一個天一個地啦！家姐唔係好愛笑，鐘意笑就大聲笑，鐘意喊就大聲喊！相反，細佬由出世開始，就好鐘意笑，無論係我地哄佢笑，定係鬧佢話佢，總之佢就係佢日笑！
我會係到諗，係咪因為我陀芊嶠個陣，返工成日唔開心，又成日炆，所以芊嶠生出來就冇咁鐘意笑，有時會有臭脾氣呢？陀細佬個時，我都會成日炆，但就係炆家姐，唔聽話，成日扭計！可能因為細佬係肚入面個陣，成日聽到媽媽同爸爸鬧家姐，所以佢一心決定，出世後用笑來溶化我地一家，等我地唔好成日鬧家姐？
的確，細佬出世後，我係笑多左，望住家姐對細佬個份窩心，會哄細佬玩；細佬撞親會呵返佢，細佬喊會話家姐錫返，我知道係因為家姐知道細佬係值得被愛錫，見到咁，我係真係好開心。另外，爸爸都笑多左，因為細佬會用笑去面對所有野，家姐喊，佢會望住家姐，用笑容去想家姐開心返，家姐每次都會因為細佬望住佢笑，佢就會唔想再喊。家姐更加唔洗講，細佬嘅出現，家姐每日訓醒開始，就對住細佬，同佢玩同佢傾計，真係笑多左好多。
我地屋企多左劻霖哩粒開心果，真係多左好多歡笑聲，我地嘅憤怒會因為劻霖你一個微笑而盡消；家姐哄細佬玩，會因為劻霖用笑去回應家姐，令家姐覺得有存在價值；爸爸會因為劻霖大笑，覺得劻霖嘅出現係好重要，而且會伴隨住劻霖一齊笑。笑其實好重要，但點先可以笑得好？冇定義。我地家因為細佬嘅出現，每日都會開心笑，你地呢？
