講小朋友點樣笑得好，其實話易唔易話難唔難，兩字記之曰：時間。

仲係BB時，陪多啲佢，你會發覺小朋友咩都笑得一餐。有時我地放個屁打個嗝甚至推下張枱有「EE」聲佢地都格格聲笑。係，BB嘅世界就係咁簡單。家母有云：「小朋友好易開心，食得飽瞓得好屁股乾乾淨淨基本上都會成日開心笑。」佢呢句金科玉律係無錯嘅，但容許我加番少少野畫龍點晴：「眼神。」

父母唔需要有劉華或朝偉般眼神，但要引BB笑，唔駛玩具嘅，但關愛眼神不可或缺。要知道BB並唔係咩都唔識。相反，佢地可能喺全家人除左最老果個太嫲太婆太公太爺之外最識睇人眉頭眼額嘅鬼靈精。無他，我地講咩佢地仲未消化到，但我地嘅神情其實佢地一兩個月大已經習慣左。聽過老人家講：「唔好成日皺眉頭唔係生件忟薑出嚟。」可能誇張左，但成日笑意盈盈咁同佢點下頭講一兩句話，你會俾到一個美好嘅世界你BB。係，喺BB嘅眼中，照顧者就係佢嘅世界，所以有啲父母即使要返工，都好中意個工人姐姐笑臉迎人咁湊住佢地嘅小朋友，即使沒有一個工人姐姐能代替父母。

有啲父母尤其爸爸，成日會埋怨：「唉個仔一過我手就喊，佢都唔黏我嘅？」其實佢地係做大事嘅人，又點會留意啲細節野？有啲媽媽係女強人，佢地又係會有同一抱怨，話自己抱BB會整喊佢，唔知係咪BB唔中意媽媽甚至話工人姐姐/奶奶/婆婆等照顧者比自己更好（眼淚，在心裏流……）。

TT話俾大家知，以上嘅事只係你地做慣大事唔夠細眉細眼啫，並唔係BB或你地嘅錯。忙左成日媽媽妝都未落個頭仲GEL到行或者塊面仲有啲唇膏味，BB唔痴你一啲都唔奇。你都唔係假期時嘅媽媽嚟嘅？陣「除」唔同喎，星期六日你係奶騷味今日係蕉蕉阿曼尼香水味，BB點笑得出呀？所以要氹小朋友笑陪佢地玩前，沖番個涼缷番你地副「戰地」裝落嚟先，你親民左，小朋友就真係一過手就笑架喇。

爸爸呢，有無除左件happy hour返嚟成陣煙酒味嘅西裝褸呀又？仲有你平日醒神到爆嘅眼鏡喺屋企未必適用，因為BB對左成日工人姐姐或者四大長老，佢地最多咪得副無框老花鏡，你又西裝褸又粗框潮鏡仲要有陣「場過場吧過吧」嘅潮味你叫佢點笑得出？記住BB係認味道同表情架，唔該你放工入廁所對住塊鏡做番個facial exercise將你一日嘅緊張辛勞稍稍放低，放番開個眉頭洗下手甚至沖個涼先同BB玩，我包你做番同照顧者同一套笑口操個BB笑得開心過日頭一百倍。

寫住咁多下次再續。