你好!我BB而家6個月大,頭兩個月飲人奶,之後慢慢變成全奶粉, 但一向便便都要兩日三日一次, 甚至試過一星期先有, 但便便狀態都軟。
我地已經常常幫BB按摩肚仔,又兩餐之間俾水佢飲,亦試過俾開奶茶,但情況都差不多。最近一星期幫佢加固,試過米糊和香蕉蓉,又差不多一星期都未有便便,係咪要停一停加固?定係試下加其他固體俾佢好D?
期待回覆, 謝謝!
2017年06月15日
BB大便嘅規律未定，未必日日都有大便架，部份BB食咗固體後，有機會改變排便習慣架，最緊要質地軟身或者糊狀。媽媽可繼續加固，唔需要停止，多選擇高纖嘅食物, 好似菠菜、茄子 、椰菜花 、西蘭花等，對排便都有幫助架，多食預防便秘嘅水果例如橙、牛油果、番石榴、奇異果、啤梨、火龍果、西梅等。仲要多飲水，例如媽媽亦可以煲下梨水/竹蔗水/紅蘿蔔水/粟米水等唔油膩嘅湯水俾BB飲。 每次食奶前繼續用掌心順時針(用陰力)按摩肚仔，另外可以將BB平躺左右腳輪流提高(好似踩單車咁)，都可以幫到BB腸道蠕動和放屁，有助排便架。如果BB出現冇胃口、冇精神、肚仔脹脹實實，或大便乾硬，就需要睇睇醫生喇！
×