小朋友扭計買嘢時，可能會講「你唔買俾我即係唔錫我啦！」，家長要點應對？想小朋友學識理財，家長可以畀佢哋知道，每個人嘅家庭背景都唔同，人哋有嘅唔代表自己一定要有，灌輸父母嘅愛唔係淨係用金錢同埋物質去衡量嘅概念。
家長不妨調轉頭諗，同小朋友講一啲淨係佢哋先「擁有」而其他小朋友冇嘅嘢，例如比起其他小朋友，佢哋會有更多親子時間、陪佢去公園玩、同埋講故事。教小朋友逆向思維、學習知足、學習同理心。理解父母工作繁忙，但係都騰出時間陪佢哋，係父母對佢哋關愛嘅表現，唔止買玩具可以體現到。
小朋友扭計買玩具，其實都係出於一時間嘅慾望。好好溝通，都不失係一個教價值概念嘅好時機。
