少年成長今日: 0|主題: 16012

收藏本版

回覆發帖

返回列表

跳至頁

查看: 6717 | 回覆: 1

一早話咗你啦！ [複製鏈接]

csir3290

子爵府

積分: 11997

1^#

發表於 25-6-29 11:44 |只看該作者 |倒序瀏覽 |打印

除咗「我都係為你好！」呢句說話之外，其實我覺得有另外一句說話作為父母嘅都應該要戒，句說話就係「一早話咗你啦！」但係偏偏其實好多父母喺仔女唔跟自己嘅諗法去做，但又做錯咗嘅時候，最常講嘅就係呢一句！但係自己都做個細路仔，大家諗下呢句說話對細路仔嘅影響係乜嘢呢！其實就係落井下石，衰啲講就係一早睇死佢錯而家落井下石，講完呢句說話就算家長再想同細路仔講乜嘢都好，其實個細路仔都已經閂埋咗隻耳仔唔會再聽，因為你一早睇死咗我！父母可能嘅原意唔係咁，只不過係想同個細路仔講下次記得聽父母講跟父母嘅諗法去做，但係用咗呢句說話其實只會令到個細路仔唔好受。
對於細路仔嚟講其實佢哋覺得根本冇必要一定要跟父母嘅諗法去做，正如我上次講，父母都覺得自己嘅諗法其實係為仔女好，所以佢哋唔跟，做錯咗父母就以為輕描淡寫咁講一句「一早話咗你啦！」就會令到個細路以後知道要跟住父母嘅諗法去做。但係父母嘅所謂諗法係咪真係最全面呢，而且當個細路仔一路長大嘅時候，其實我覺得尊重同埋聆聽更加緊要，在我嚟講我會覺得細路仔真係未必需要跟住父母嘅諗法去做，佢哋有佢哋嘅諗法，如果成日都只係跟住父母，咁只不過係一成不變，對於細路仔嚟講，喺佢嘅成長過程入面，父母對佢嘅聆聽同埋尊重畀幫佢決定一切更加緊要。作為父母真係應該要諗清楚點解仔女一定要跟我哋嘅諗法去做呢！把口就成日話要培養細路仔嘅獨立思考能力，咁我哋做父母又係咪真係畀咗機會佢哋去實踐自己嘅諗法呢？細路仔喺成長個過程中錯係一定㗎喇，正如我成日都講錯咗唔緊要，只要我哋陪伴細路仔從中汲取教訓，反而仲會獲得細路仔嘅尊重。做父母真係要戒除一個心態，就係仔女一定要跟我哋嘅諗法去做，正如我上次講，其實仔女又好，父母又好都需要有啲妥協，冇話邊個一定要跟邊個嘅諗法去做！如果我哋已經將我哋嘅睇法同仔女講咗，而仔女最後決定都係跟自己嘅諗法去做嘅時候，我諗我哋真係需要尊重。講真如果大家平時都係有商有量，又懂得妥協嘅藝術嘅話，其實去到一啲大事大非嘅問題上面，其實仔女調返轉頭都會尊重返父母嘅諗法，同埋多啲考慮父母嘅諗法。父母點解要咁強調仔女一定要跟自己諗法去做呢？係咪唔跟就係唔孝順唔聽話呢？但係我自己就覺得與其訓練一個只係識得聽話嘅細路仔，更緊要嘅就係訓練佢哋有獨立嘅思考懂得全盤考慮然之後先作出決定嘅細路仔，只係一味盲目跟住父母嘅諗法，只不過訓練咗一個裙腳仔出嚟，而且可能個細路仔心中根本就不服父母嘅諗法最終令到大家嘅關係破裂。

所以除咗唔好講「我都係為你好」之外，更加一定要戒除「一早話咗你啦！」呢句說話。只要為人父母嘅真正明白，其實仔女係一個獨立個體，我哋真係需要培養佢哋有獨立思考嘅能力，懂得聆聽同埋尊重咁先至係維持大家良好關係嘅基礎。「一早話咗你啦！」呢句說話看似簡單，看似一句好普通嘅說話，但係其實呢句說話發揮咗落井下石嘅作用，表示父母一啲都唔理解仔女嘅感受，成日講呢句說話嘅父母又點會得到仔女嘅尊重呢！