少年成長今日: 0|主題: 16012

收藏本版

回覆發帖

返回列表

跳至頁

查看: 21790 | 回覆: 2

強制與選擇 [複製鏈接]

csir3290

子爵府

積分: 11999

1^#

發表於 24-12-22 10:39 |只看該作者 |倒序瀏覽 |打印

早幾日喺舊同學聚會，同一個做老師嘅舊同學傾開，而家仲有冇學校要番學收學生手機，直到放學先至可以攞返呢？我呢個舊同學正正就係話佢教嗰間中學，就係要啲學生每一日返到學校之後第一件事就係將部手機交畀學校保管，直到放學先至可以拎返。咁我話每一日放學咪排長龍攞手機囉？佢話啲學生都已經習慣曬所以冇乜問題！而且佢話因為佢唔係負責收手機嘅同事，所以佢係享受咗學生冇手機嘅成果，佢覺得咁樣幾好，起碼上堂唔會出現學生玩手機嘅問題。所以佢好贊成呢個做法。但係我就話而家手機咁普及，如果仲係用緊收手機嘅手法防止學生上堂玩手機好似唔係咁好喎！講真而家出街食晏好多地方都已經手機落單，佢啲學生連食晏都攞唔到手機，咁出街食飯嘅時候係咪會有少少麻煩呢？而且講真個個學生交手機嘅時候，部手機都係熄咗學校又唔會檢查部手機，咁佢哋交部舊手機返嚟其實都係控制唔到。咁點解要製造一個機會比學生講大話呢！

我自己就唔係好贊成用收手機嘅手法去控制學生上堂唔好用手機，而且講真我自己阿仔阿女都有講，其實好多時而家手機咁普及，上堂嘅時候老師都會要佢哋自己用手機去搵資料，所以其實手機對佢哋嚟講都係一件上堂嘅工具。咁當然你畀得部手機佢，當然亦都會擔心佢哋上堂會攞嚟玩，但係都已經係中學生，我自己就覺得正正就係需要教佢哋自律同埋恰當咁用自己部手機，如果下下都只係強制收咗佢部手機，用禁制嘅方法，對某啲學生嚟講，其實只不過係教佢諗方法點樣去反抗呢啲做法。所以係呢件事上面，我就覺得其實係要教細路仔做事要諗清楚後果，例如佢哋會知道如果上堂畀人發現喺度玩手機嘅話，咁部手機就需要被沒收，咁佢哋就要知道做事之前要諗清楚代價。萬一真係畀人沒收手機亦都要心甘命底，因為後果自己一早就知道。我成日都覺得尤其是去到中學生，畀機會佢哋自律，同埋畀機會佢哋去選擇，係教佢哋學識守規矩一個好重要嘅階段。如果事事都只不過係強制，講真，到冇人強制嘅時候，佢仲會唔會收呢啲規矩呢！即係我哋成日都講，其實我哋希望能夠教到細路仔就係當冇人見到嘅時候，佢哋都仲係一個守規矩嘅人。因為當只有做到咁嘅時候，佢哋先至真真正正知道做事係要諗清楚後果，唔通真係要冇咗自由先至懂得依法守規嘅重要性？

我哋成日都話中學生就係反叛嘅一群，其實正正就係需要成年人畀多啲機會佢哋去發揮，畀多啲機會佢哋去選擇，成年人嘅責任就係要從旁協助佢哋明白自己嘅責任，協助佢哋了解做每一件事嘅後果。當細路仔年紀細嘅時候，用強制嘅方法可能會好容易達到效果，但係當佢哋慢慢長大，其實相對畀返更多嘅自由佢哋學懂選擇同埋承擔做事嘅後果。

0 0 0

私人傳訊回覆引用

wholemilk

大宅

積分: 3357

2^#

發表於 24-12-24 22:40 |只看該作者

你嘅諗法好好，但最好等家長回家慢慢哦佢哋，唔好要老師為咗訓練紀律而拖慢教學進度，咁對其他想讀書嘅同學唔公平。

私人傳訊回覆引用

wan_sosin

珍珠宮

積分: 48400

3^#

發表於 24-12-26 22:24 |只看該作者

回覆樓主：

本帖最後由 wan_sosin 於 24-12-26 22:24 編輯

我仔學校初中要收手機，高中就要熄機收起唔響，午膳可以帶出街。
初中出街食飯係麻煩少少，只能用現金/8達通，電子餐券又用唔到。啲學生會唔會呃老師呢？好難話無，但捉到會好麻煩，沒收手機，扣操行分仲要家長親身到學校去領取返部手機。