樓主,你個常備菜定義係咩?煮好晒,食果陣只係翻熱?定係準備好食材,每晚可以快手煮,好快食得?
疫情時唔可能日日出去買餸,一星期去買一兩次,要夠咁多人咁多餐食,冇咩可能日日都豐富,果陣基本食材會囤好,排骨一次買三餐,分開包放冰格,食之前果日由冰格拎出嚟解凍,煮果陣再醃,有得醃半個鐘已經OK。雞翼/肉又係差不多處理方法,海鮮如急凍蝦/魚買D放冰格,只要之前一晚拎出嚟解凍就點煮都得。
菜又係買完包好每餐一包,煮之前先摘/切,淥菜最簡單,加少少肉片落去,就連湯都有埋。我屋企人好鍾意食蕃茄炒蛋,呢樣真係又簡單快手又好味。其他蔬菜好似青瓜、紅蘿蔔、西芹、暮仔,絕對放得耐,隨時可以配搭上枱。我有木耳、雲耳、雪耳、金針、粉絲呢D乾貨喺屋企,幾樣一齊炒,或者加雞肉/排骨炆,次次都清碟。
對食西餐OK的話,煮下意粉、沙律、pizza又得,呢D看似好花時間,其實安排好的話,好快食得。
有時我都會炆煲豬肉、咖喱雞、咖喱魚蛋等,可以配搭食兩三餐,但真係要妥善存放,唔好食太多日,翻熱更加係食幾多熱幾多,唔好一煲熱完又熱,唔安全。
花旗太太生活在花旗國,留意時差,你問我未必即時答到。