少年成長今日: 0|主題: 16013

收藏本版

發帖

返回列表

跳至頁

查看: 14547 | 回覆: 1

選校策略 [複製鏈接]

csir3290

子爵府

積分: 12004

1^#

發表於 21-7-25 10:11 |只看該作者 |倒序瀏覽 |打印

家姐終於都升中學，亦都去到一間我同老婆都覺得適合家姐嘅中學，所以都總算放下心頭大石。講到搵學校，其實我都真係好佩服我老婆幾有諗法。其中好主要嘅原因係我哋實在太了解阿女嘅能力，再加上我哋識得太多教書嘅朋友，所以阿女升中搵學校都總算順利，喺第一階段自行收生已經有學校收咗。

阿女小學都算係一間地區名校仲要係精英班，所以其實都幾「谷」啲學生，阿女嘅成績一路都算平穩，雖然未必係頭十名，但係老師同埋我哋嘅分析都覺得佢一定係喺band1頭入面，所以選學校嘅時候，一早老師就已經同佢哋班同學鎖定咗區入面兩間都算係top嘅地區名校。嗰兩間band one嘅中學，排第一嘅係出名「谷」啲學生，而全港排名亦都前啲；另外一間就係教會學校，感覺上多啲關愛排名，全港排名只係比第一間低少少，而兩間中學入大學嘅入學率都係差唔多。

阿女間小學大部分嘅同學都係揀第一間，因為係聯繫學校再加上喺地區入面算係最出名嗰間。而嗰兩間中學亦都好主要收我個女嗰間小學嘅band one學生，因為我女間小學喺區入面算係最好成績嗰間。到選校嘅時候本來我都以為我老婆會揀第一間，因為普遍阿女嘅同學同埋家長全部都係揀第一間。但係我老婆嘅分析就係第一間成績實在太勁同埋「谷」得太緊要，再加上我問過好多教書嘅朋友都覺得第一間中學因為佢太多叻嘅生，所以入面嘅競爭好大，如果唔係入到精英班，學生得到嘅關注就會比較少。而正正因為阿女嘅同學尤其是考得前個阿女嘅同學都係揀第一間，所以反而佢覺得阿女揀第二間會比較適合。我老婆話雖然阿女成績唔差，但係佢性格比較慢熱，有陣時會有少少hea，所以我哋唔想「谷」得佢咁辛苦，再加上而家女嘅成績喺第二間，佢應該一定可以入到精英班。再加上我哋嘅老師朋友普遍都話如果兩間中學嘅排名差唔多，唔好勉強追求最叻嗰間。因為始終學校都係有精英班，如果你入到精英班一般就係嗰間學校最受關注嘅學生，乜嘢比賽或者其他方面嘅資源都會係擺喺精英班最多。所以最後選校嘅時候老婆就幫阿女揀咗第二間作為第一志願，已呀女亦順利喺第一階段已經入到排第二嗰間嘅中學。

我哋唔係覺得阿女考唔到第一間，而呀女嘅成績應該都可以考到，因為到七月放榜嘅時候阿女嗰班同學絕大部分都係考到第一間，連考得後過女嘅都係去咗第一間。其實當時我都有諗過叫我老婆不如試下扣門扣返第一間啦！但係我老婆就話而家阿女入嘅呢一間中學關愛多啲，而且又會讀得輕鬆啲，最重要係以阿女嘅成績佢一定入到精英班，咁點解要畀佢入去一間讀得辛苦啲但係又未必肯定入到精英班嘅學校呢！況且呢兩間嘅中學全港嘅排名只係爭少少，而且大學入學率仲係差唔多，咁冇乜必要再去博。再加上連阿女都講佢鍾意而家呢間學校多啲。

我好多教書嘅朋友都講其實香港嘅教育制度好現實，嗰啲所謂全港排名比較前嘅學校，為咗要保持住學生嘅成績所以都會好「谷」啲學生，而且好多亦都好現實，只要成績稍為差啲入唔到精英班，其實個待遇已經差好遠。我的教書嘅朋友仲講其實有幾間好出名嘅學校都會用勸退嘅方式令到成績差嘅學生自己離開。

其實我都同一般家長一樣，開頭有啲介意點解阿女嘅成績唔諗第一間而揀第二間呢？始終第一間名氣都大啲。但係我老婆一句說話點醒咗我，佢話如果你要喺第一間，你就要用好多方法「谷」，雖然都係可能會入到精英班，但到時大家都辛苦。如果你喺第二間，雖然全港排名後咗少少，但係成績一樣都係咁好，而呀女亦都一定應付到，正所謂「池中無魚蝦為大」嘛！情況就好似如果你係精英班但年年考包尾好，定係唔係精英班但係年年考第一好呢！不過講到最後都要靠阿女繼續努力繼續保持住自己嘅成績啦。作為家長幫子女揀學校其實真係要了解自己仔女嘅程度同埋能力呢！高估仔女嘅能力就算好彩俾你去到一間全港排名最高嘅學校，但係到頭來又係咪開心呢！