親子旅遊

收藏本版
發帖
返回列表
跳至頁

首頁
1

尾頁
   0
晞晴媽咪


別墅

積分: 563


1#
發表於 05-7-25 00:34 |只看該作者

五日四夜名古屋世博+東京自由行遊記

老公由於一早決定趁六歲大女放暑假同佢去一次東京玩 , 順便睇名古屋博覽會 , 所以六月初已經去旅行社搵D五日四夜名古屋+東京自由行package (兩晚名古屋 ,兩晚東京酒店) , 點知人算不如天算 , 由於有博覽會的緣故 , 名古屋D酒店爆到死 , 行左好多間旅行社都話無信心book 到, 叫我地考慮四晚都住東京 , 然後搵日搭新幹線落名古屋睇博覽會 (即日來回) , 最後我地堅持要住兩晚名古屋同唔介意散買機票同酒店 , 好彩最後都被我地book 到, 但我同老公份團費要加$700, 亞女加$300 , 不過 , 總算可順利成行.....
私人傳訊

晞晴媽咪


別墅

積分: 563


2#
發表於 05-7-25 00:39 |只看該作者

Re: 五日四夜名古屋世博+東京自由行遊記

Day 1
香港 --> 名古屋
為左可以爭取時間參觀博覽會 , 我地揀左搭國泰加班機, 凌晨3:00 由香港直飛名古屋 , 由於唔想搭幾百蚊的士去機場 , 惟有凌晨12:30從屋企出發搭A22, 因為晚上較少飛機升降, check-in 好快攪掂, 不過, 9成舖頭已經關門, "大那那"個幾兩個鐘都幾難捱, 惟有買杯野飲坐在大家樂等上機, 亞女一直好興奮, 在機場等候期間不斷無時停, 希望佢上到飛機唔好嘈住其他人瞓 .....

終於捱到上飛機 , 至發現班機得好少人坐, 叫左老公同個女兩個人坐窗口孖位, 我自己就一個人坐晒中間一行, 正呀......眼訓到死, 立即同"周公"報到....六點左右, 空姐開始派早餐, 嘩.....難食到無人有, 只是吃了個麵包同杯果汁, 好在班機準時到達名古屋中部國際機場, 過關又快, 不過, 始終是第一次去名古屋, 一時間都唔知點搭車去JR名古屋站, 惟有周圍問下D日本人, 終於成功上到火車啦.....經過約大半小時車程, 我地就去到"名鐵名古屋站, 而JR名古屋站只是在隔離, 今次我地Book左 Royal Park Inn, 這間酒店和JR名古屋站只需行兩分鐘, 十分方便, 在酒店放低行李後, 就立即出發去博覽會 , 我地先在JR名古屋坐JR中央本線去到萬博八草站(車程
約35分鐘), 再坐兩個站(車程約三分鐘)磁懸浮列車到達萬博會場站 (即博覽會場北口)....在火車上已經見到不少人猛刨份博覽會場刊, 相信已不是第一次去玩, 最......好彩是居然在轉車途中遇到那兩隻由人扮的世博吉祥物 - 森林爺爺和森林小子, 亞女同老公立即好興奮地以9秒9過去影相啦....我就好醒目去找工作人員, 最後我們旅程中的第一張合照就掂左啦....

由於老公之前已經好醒目在世博網站BOOK 定一D熱門展覽館, 所以可節省不少排隊時間, (註: ** 無論大人或小童門票, 均可於網上預約最多兩個展覽館**) 為可盡量參觀更多展館, 我先用門票的預約Booking參觀 Toyota 館 , 那些演奏樂器的機械人表演真是十分精彩 , 同時間, 老公就帶亞女用他那張門票的online booking , 去看 Hitachi 館, 由於每個booking 只限一人入場, 老公於是屈個工作人員放埋亞女入去, 嘻嘻....掂左....老公和亞女同時說 Hitachi 館的立體視覺森林歷險十分好玩, 如果不是那麼多人排隊, 一定再玩一次. 唔覺唔覺, 差不多下午二時, 想起在飛機上只吃了一個包, 好肚餓, 拿拿臨帶個女去food court 食D野, 老公話想周圍行下, 於是自己同個女一人叫了一碗天婦羅烏冬(800 yen/bowl), 十分好食....食飽飽之後, 見老公仲未返, 於是同個女去排隊睇"山水夢境"展館, 今次個表演只是普普通通, 個人意見是....不夠時間, 可以不看.

同老公會合之後, 個女話想坐摩天輪, 於是惟有排隊啦, 好彩只排了約半小時就有得玩, 講真...個摩天輪都OK好玩啦, 它最特別是一半在展館內, 一半可在室外居高臨下欣賞整個會場, 當它由室內轉出室外時, 個女覺得十分有趣; 玩完之後, 老公看見隔離有"JR磁浮列車館", 又不是有太多人排隊, 於是一家人又過去參觀了這個火車館, 個人意見, 除非對高速火車有興趣, 否則, 不夠時間, 可以不看....嘻嘻....

行下行下....差不多黃昏六時, 老公醒起他在網上用亞女張門票book 左參觀"日本館", 於是立即趕過去入場, 諗住用返之前個招, 屈個工作人員放埋我地兩公婆是但一個入場, 點知個日本妹好似完全聽唔明英文, 講左一論, 最後好在個super出來了解一下, 今次又掂左....老公叫我同個女睇先, 話個360度全球體影視系統好正....他自己會去"全球之家" 的 "Orange Hall" 看一下, 果然不出所料, "日本館"套"全球體影視系統"真是十分有趣, 難怪從早到晚都多人啦....

看完出來後, 亞女話好肚餓, 於是就選了在日本館附近的"壽司店 -- 角"吃晚飯, 這店的壽司十分好吃, 亞女說未見過
迴轉壽司店有....溫室蜜瓜, 新鮮無花果...等等的時令水果, 一家人在此飽餐一頓, 只需5,800yen...

由於已玩了大半天, 一家人都十分倦, 所以老公提議逛一下紀念品店就回酒店了, 點知走到出口的時候, 已差不多九時了, 出口已擠滿了回程的遊客, 足足排了半小時才可以上到火車, 返到酒店已差不多十時半, 成家人眼瞓到想死....
各自沖完涼就上床了......

<明天續....>
私人傳訊

YatYatmommy


大宅

積分: 2856


3#
發表於 05-7-25 10:30 |只看該作者

Re: 五日四夜名古屋世博+東京自由行遊記

Hi 晞晴媽咪,
好開心終於見到有媽咪係度post 去博覽會的blog,
你知啦,
去博覽會係要喺有限時間,
睇最多場館, 咁先無遺憾.

雖然之前係其他website都睇過好多,
但單身?佬咁去,
同好似我地咁拖男帶女,
難度高好多嘛

你就好啦,
on line book 到 hitachi館,
我今朝試過,幾乎每過一版,
都比佢彈出來一次
由個館not yet, 跟住available,
limited，最後 full :cry:

等住你嘅下集呀
私人傳訊

yk


男爵府

積分: 5443


4#
發表於 05-7-25 11:26 |只看該作者

Re: 五日四夜名古屋世博+東京自由行遊記

晞晴媽咪,

好勁呀. 搭完零晨機都仲可以去世博玩足一日.

好期待你餘下的旅程.

私人傳訊

viviwawa


複式洋房

積分: 404


5#
發表於 05-7-25 13:24 |只看該作者

Re: 五日四夜名古屋世博+東京自由行遊記

嘩！真令人興奮，朋友之前去世博，已經鬼咁羡慕，依家睇完你的上集，已經好想去！幾時有下集呀？
私人傳訊

kikimon


別墅

積分: 943


6#
發表於 05-7-25 13:49 |只看該作者

Re: 五日四夜名古屋世博+東京自由行遊記

好羨慕呀....

你個行程認真高難度, 令晨起程都俾你搵到


私人傳訊

晞晴媽咪


別墅

積分: 563


7#
發表於 05-7-26 00:56 |只看該作者

Re: 五日四夜名古屋世博+東京自由行遊記

Day 2
名古屋 -- 名古屋博覽會 (續)

瞓左一晚, 大家的狀態都比之前一日好, 由於老公話book 左 早上10:00參觀"全球之家"的"Blue Hall", 所以8:30就再由酒店出發到博覽會 , 有之前一日的經驗, 我們對那條火車線已經十分清楚, 惟一預計不到的是遊人比之前一日多得很, 只好放棄好好吃一個早餐, 改為在沿途的便利店買了些麵包和飲品在火車上吃, 爭取時間, 點知只是排隊進場也用了差不多40分鐘, 趕不及了; 一家人只好在"Blue Hall"場外排隊拿當日的預約票, 因亞女一直嘈住要坐吊車, 於是就去排隊買票坐森林小子纜車, 由於我們之前買了JR名古屋與世博會場站的火車來回票, 可於購買纜車票時出示回程票而獲折扣(忘記了每人可減100yen or 200yen), 老公說架纜車可載我們從會場北面到南面, 可順到到會場的其他地方逛逛,下車後, 發現南面的展覽館並不十分吸引, 加上又有些肚餓, 所以惟有在food court買了一客美味的燒八爪魚丸和一些飲品,稍作休息....

由於老公之前book左同亞女於12:45到Toyota館看演奏樂器的機械人表演, 於是趕快搭纜車返回會場北面, 而我就用之前拿的預約票去"全球之家"的"Blue Hall"參觀那部長50米巨型Sony超大屏幕, 展館內會利用這部屏幕播放一套關於地球和人類現況的短片, 效果....一個字: 正!!....

同老公會合返之後, 我們就一齊參觀今次博覽會的重頭戲---Toshiba館, 老公說他是在網上好不容易才book到這個館, 看到那條長長的人龍和大大的太陽, 我真不想在烈日下排上一小時以上, (註: 好可怕, 曾經見過展館門口個牌寫著:現時排隊需時2小時50分), 這個Toshiba館真不愧是博覽會的"長龍之首",相信大人和小朋友都會覺得它十分有趣, 每位入場的遊客會先進行3D立體照相, 然後大家就可以安坐在舒服的劇場欣賞一套類似"太空歷險記"的電影, 而電影的各個角色會經由先進的技術將各位參觀者的臉孔結合, 電影播放期間, 大家的笑聲此起彼落, 各人都忙著在電影中找出自己, 看看自己會擔任那個角色, 而整個場館會被分為幾個小劇場, 而每個場約可容納20人左右, 即同時間會有大約100人在欣賞自己精彩的"演出"....哈哈...不過, 如果自己不喜歡的話, 你也可以告訴在場工作人員你不參加拍照, 當然無咁好玩啦.....

唔經唔覺, 大家又肚餓啦....嘻嘻....於是今次我們在日本館附近找到一間有冷氣的快餐店吃拉麵, 這餐埋單---兩碗拉麵+飲品約2,200yen....

吃飽飽亞女又唔願行, 於是貪得意同個女去排隊搭一程博覽會的士, (每人: 300yen), 這輛"的士"好像人力車, 不過是由工作人員以踏單車模式操作, 看著那位司機大汗踏細汗, 我和亞女落車時都跟他說了很多次　"Thanks You!!".

差不多下午3:00, 老公說可以到煤氣館門外拿預約票看火焰奇幻魔術, 亞女一聽到可以看現場魔術表演, 已表現得十分興奮, 幸好人龍不太長, 我們拿到了三張5:00p.m.的預約票, 正準備看看先到那個場館打發時間, 老公又提醒我們他在網上book了4:00p.m.可以同個女去"奇趣電力館"玩電車巡遊, 天啊!! 究竟他在網上book了幾多個館 ?? 個女聽到他形容得十分有趣, 於是又拉著我們行去電力館, 去到場館門口又未入得場, 好熱呀!!! 於是準備入去附近間小型紀念品店涼下冷氣, 亞女又無興趣, 於是老公帶她到場館門外的噴水池玩水, 當我從紀念品店行出來時, 見有些小朋友玩到脫光衣服, 大叫大笑, 好在個女只是除左對鞋, 條裙仲在身上, 拿拿聲叫佢著返對鞋入場, 真搞笑.....對小朋友來說, 這個電力館電車巡遊,應該列入受歡迎榜頭三位, 當電車經過一D黑漆漆而又用七彩燈泡砌成的地區, 整輛電車的小朋友都發出驚嘆的"嘩嘩!!"聲, 玩完之後, 亞女已經嘈住玩多次, 我們帶她到人龍看一看, 這次要排....至少50分鐘, 看到她失望的樣子, 老公立刻送上軟雪糕一個, 即刻笑返....掂左....

吃完雪糕, 又是時候返回煤氣館看火焰奇幻魔術, 由於有預約票, 我們又可以行express line進入場館, 對於大人來說, 這場魔術表演可算OK, 小朋友可能又會覺得好有趣, 或者是個主角夠生鬼啦....看完魔術表演, 老公叫我同個女去飲杯野或者逛逛紀念品店, 他要利用最後一個網上booking去埋尋日無去的日本館; 由於老公話晚上出返市區吃飯, 所以我同亞女發揮女子應備的掃貨本色, 在近出口的紀念品店掃了不少紀念品和零食, 當老公回來的時候, 忍不住問我是不是忘記明早要搭新幹線上東京玩, 哈哈, 唔緊要啦, 最多晚上好好將一大袋紀念品和零食pack入喼啦.....

回程的時候, 可能時間尚早, 沒有昨晚那麼多人, 在轉車途中看見JR ticket office 還沒有關門, 拿拿臨入去買了3張明早9:30分從名古屋到東京的Nozomi 新幹線車票, 然後返回JR名古屋站隔鄰百貨公司的餐廳樓層, 選了一間位於12樓的燒烤店吃了一餐舒服而又好吃的晚餐, 那位侍應可能見我們是遊客的緣故, 特別安排了一張靠窗的抬給我們, 連日來只是專注於世博,並未真正好好欣賞一下名古屋, 這晚看著窗外美麗的夜景, 令我們大家都不約而同想慢慢地享受這餐晚飯......
(烤肉晚餐: 10,450 yen)

吃完晚飯, 老公努力地收拾好行李, 準備明早搭火車上東京, 對於今次博覽會的成績, 老公就話比預期中滿意, 可參觀到的場館亦不少, 他說未來三日都要同亞女玩得開開心心......

＜續．．．東京遊記＞
私人傳訊

肥仔媽咪


子爵府

積分: 13946


8#
發表於 05-7-26 10:15 |只看該作者

Re: 五日四夜名古屋世博+東京自由行遊記

晞晴媽咪,

雖然沒有機會去但看到你的遊記就等如去過一樣, 多謝!
私人傳訊

YatYatmommy


大宅

積分: 2856


9#
發表於 05-7-26 12:20 |只看該作者

Re: 五日四夜名古屋世博+東京自由行遊記

hｉ晞晴媽咪，
嘩，你老公好犀利，
ｂｏｏｋ到咁多個館，
唔駛你兩排隊排咁耐，
我喺８月底去，
但到依家都未曾成功ｂｏｏｋ過一個館 :-(
私人傳訊

晞晴媽咪


別墅

積分: 563


10#
發表於 05-7-29 00:26 |只看該作者

Re: 五日四夜名古屋世博+東京自由行遊記

Day 3
名古屋 -- 東京

由於昨晚買了早上9:30分從名古屋到東京的Nozomi車票, 於是晨早8:30 辦好check-out 手續後, 便到酒店餐廳吃一個豐富的自助餐早餐, 亞女話來了日本兩天, 這個早餐最"正!", 哈哈....眼看時間差不多, 便快快趣趣拖著行李到JR名古屋站等新幹線,以我這個每半年便去一次日本的日本狂來說, 這次也是第一次坐新幹線, 心情同個女一樣興奮....坐Nozomi上東京約需1小時40分, 由於今次老公又是訂了池袋的Crown Plaza Metropolitan Hotel, 貪間酒店既近JR池袋站, D房又大間, 仲可以request 間房有Internet 上網設備, 我同老公就可以用帶來的Notebook 上網收email 和上 BK 啦....

話咁快我們就去到東京站, 跟著好順利找到JR線月台再搭JR山手線到池袋站, 拿拿臨在酒店 check-in 完之後, 就帶亞女去我們在東京的第一個旅遊點 --- 池袋SunShine City. 我們一行人本來首先到餃子城吃午餐, 然後再上樓上一層雪糕城吃雪糕, 點知發現雪糕城隔離新開了一個忌廉泡芙城, 看著那一個個精緻又美味的泡芙, 老公同個女已經急不及待要買來一試, 嘩....yummy...對於小朋友來說, 雪糕永遠也有一定程度的吸引力, 我們也是第一次看見亞女對著一排排雪糕櫃唔知點算好, 一些她聽都未聽過的味道對她來說的確十分吸引, 最後, 老公幫佢揸主意揀了一個"波子汽水"味的雪糕, 粉藍色的, 好特別; 而我自己就買了一個今期"人氣"榜首的"白鳳桃"雪糕, 美味的鮮奶軟雪糕+新鮮白鳳桃+少許薰衣草味蜜糖, 嘩嘩....靚到唔捨得食...不過, 好好味呀!!! 之後, 老公話佢負責帶亞女上頂樓海洋館同展望台行, 叫我自己在Sunshine City shopping, 話.....正呀!! 二話不說, 分道揚鑣, Comme Ca Ism, Disney Shop, Sanrio Shop, 龍貓商品專門店...等等, 好耐都無試過自由自在shopping 啦, 收穫當然不錯啦! 最開心是成功地在玩具反斗城幫歲半細女買左一箱(八罐)的雪印大仔奶粉, 平時在"卓悅"買水貨都要$168/罐, 現在每罐只需約$96. 拿拿臨即刻幫細女抬一箱返香港啦....點知一箱奶粉太重啦, 惟有打電話call老公同個女來抬箱奶粉返酒店.....

返到酒店成身散"曬", 老公仲問無啦啦買箱咁重的奶粉, 當我話佢知D奶粉賣幾多錢時, 佢就話我點解唔買多箱, 大佬呀....真係好重架!! 抖左一陣, 又是時候出動吃晚飯, 老公話不如帶亞女出新宿吃蟹, 一於就去"蟹道樂"啦...即刻出發搭JR由池袋去新宿, 話咁快就到, 出左新宿站就見到"百果園", 即刻一家人行去買生果, 除了買些返酒店食之外, 老公同個女仲一人買了一支切好的西瓜和蜜瓜, 好甜好好食....點知人算不如天算, 搵極都搵唔到歌舞妓町果間"蟹道樂", 亞女又話唔想再行, 老公話不如試間日式燒烤居酒屋, 看到那舖頭門外有專人負責用炭火替客人燒烤新鮮的海鮮和串燒, 唔使自己燒到一陣味, 就決定今晚試新野, 我地叫左....海膽, 金鎗魚刺身, 炸碟魚, 鹽燒巨型大帶子, 大蝦, 串燒雞肉...等等...好好味...(埋單: 8,300yen) 食飽飽亞女又話想去遊戲機舖夾毛公仔, 點知一般機舖晚上10:30後多數都唔俾18歲以下入, 好不容易搵到一間, 經過老公一番努力+用左800yen, 亞女終於得到佢旅程中第一個公仔, 是一個有佢半個人咁高的Twin Star - Kiki, 佢開心到一路抱住個公仔返酒店, 臨離開新宿之前, 沿途見到間好出名的"天神博多"拉麵店, 無理由唔食架...同個女三個人叫左兩碗麵一齊食, 食飽宵夜就好滿足咁搭JR返酒店大覺瞓......

＜續．．．東京遊記＞
私人傳訊


首頁
1

尾頁

跳至頁
返回列表
回覆
發帖

© 2025 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見