少年成長今日: 0|主題: 16012

收藏本版

發帖

返回列表

跳至頁

查看: 7190 | 回覆: 1

贏咗場交又如何！ [複製鏈接]

csir3290

子爵府

積分: 11999

1^#

發表於 19-6-30 11:18 |只看該作者 |倒序瀏覽 |打印

前幾日送阿女去學琴一出電梯就見到有對夫婦喺𨋢口附近度應該係為咗去邊度食飯爭論不休，個老公就話個老婆唔講道理同麻煩，而個老婆就好忟憎咁喺度反駁。夫妻之間有意見本來好普通，但係我見到原來佢帶住一個我諗應該大約三四歲嘅小朋友喺側邊，個小朋友個表情好似好唔開心咁坐咗喺度，係咁望住佢嘅爸爸媽媽喺度爭拗，我哋當然冇企喺度望住佢哋做乜嘢，只係行過就算但係連阿女都忍唔住要回頭望返佢哋。到我送咗阿女去學琴行返轉頭嘅時候，都仲見到佢哋喺度拗緊，佢哋個女就依舊都仲係坐喺嗰度望住佢哋。

兩夫婦有唔同意見本身係正常，但係如果為咗啲雞毛蒜皮嘅嘢喺啲仔女面前嗌到大家都唔肯相讓咁又何必呢？我同我老婆個關係其實我覺得都好好，但係唔代表我哋會所有諗都係一樣，有陣時都可能會有唔同嘅睇法或者意見，但係咁大個人我總係覺得要懂妥協，而且當你有細路仔嘅時候你要諗嘅唔淨止係自己仲要諗埋個細路仔。成日喺細路仔面前嗌到爭論不休互不相讓，咁到頭畀你贏咗場交咁又點呢?我唔係話永遠只有一方要退讓，而係咁大個人當但係為咗細路仔為咗大家嘅關係同埋相處，係咪應該學識妥協同埋互相諒解呢？我哋成日要教細路仔唔好成日發脾氣，要禮讓要分享要懂得體諒別人要識得妥協，其實呢啲嘢細路仔全部都係喺父母身上學返嚟。喺學校就算老師點教，但係返到屋企見到父母係另一副模樣，咁佢哋又點會學到呢啲特質呢？我唔係話原則唔緊要，但係家庭入面過份堅持自己嘅原則，過份堅持要自己話事要自己贏曬，贏咗場交咁又點呢可能輸得仲多！如果父母經常都為咗啲雞毛蒜皮嘅嘢，已經常有拗撬，父母又唔肯放低自己嘅尊嚴去學懂妥協，學懂體諒而經常喺細路仔面前嗌交，其實為咗細路仔著想，父母應該真係要好好考慮下條路點樣行落去同點樣相處。細路仔係呢啲環境長大就算有個所謂嘅完整家庭，咁佢哋係咪冇得開心呢？整個家庭嘅關係係大局，如果我哋重視呢個大局，咁係咪每個人都應該放得一啲自己嘅自我或者自己嘅諗法要為大局著想呢！一個家庭最緊要係大家都相處得開心，如果有一方係經常處於唔開心嘅狀態。咁條路點樣行落去呢！而呢個家庭係咪又係對大家都好呢！